सरकारले गर्यो प्रहरी महानिरीक्षक दानबहादुर कार्कीलाई बर्खास्त

काठमाडौं । नेपाल प्रहरीको नेतृत्वमा सरकारले अप्रत्याशित परिवर्तन गरेको छ । विवादमा तानिएका प्रहरी महानिरीक्षक दानबहादुर कार्कीलाई जिम्मेवारीबाट हटाउँदै सरकारले एआईजी मनोज केसीलाई नयाँ आईजीपी नियुक्त गरेको छ । म्यादी प्रहरीको पोशाक खरिदमा अनियमितताको आरोपदेखि बिचौलिया इनम सापकोटासँगको सम्पर्कसम्मका विषयले विवादित बनेका कार्कीलाई प्रधानमन्त्रीको विशेष सुरक्षा सल्लाहकार बनाइएको छ । सरकारले यसलाई बर्खास्ती नभई जिम्मेवारी हेरफेर भने पनि छोटो समयमै प्रहरी प्रमुख परिवर्तन गरिनुलाई अर्थपूर्ण रूपमा हेरिएको छ ।

प्रहरी महानिरिक्षक दानबहादुर कार्कीलाई सरकारले पदमुक्त गरेको छ । प्रहरी महानिरीक्षक (आईजीपी) दानबहादुर कार्कीलाई जिम्मेवारीबाट हटाउँदै एआईजी मनोज केसीलाई नयाँ प्रहरी महानिरीक्षक बनाउने निर्णय गरेको हो । बुधबार बसेको मन्त्रिपरिषद् बैठकले केसीलाई प्रहरी संगठनको सर्वोच्च पदमा नियुक्त गर्ने र कार्कीलाई प्रधानमन्त्रीको विशेष सुरक्षा सल्लाहकारको जिम्मेवारी दिने निर्णय गरेको हो । केसी यसअघि प्रहरी प्रधान कार्यालयअन्तर्गत अपराध अनुसन्धान विभागको प्रमुखका रूपमा कार्यरत थिए । गत कात्तिक २७ गतेदेखि प्रहरी प्रमुखको जिम्मेवारी सम्हालेका कार्कीको कार्यकाल भने अपेक्षाभन्दा निकै छोटो समयमै टुंगिएको छ ।

सरकारको यो निर्णयले प्रहरी संगठनको नेतृत्व परिवर्तन मात्र गरेको छैन, पछिल्लो समय प्रहरीभित्र र सरकारसँग चुलिँदै गएको विवादलाई समेत नयाँ मोड दिएको छ । तर, कार्कीलाई हटाउने निर्णय एकाएक आएको भने होइन । पछिल्लो समय निर्वाचन प्रहरीको पोशाक खरिद प्रकरणदेखि बिचौलिया इनम सापकोटासँगको सम्पर्कसम्मका विषयले उनी विवादमा तानिएका थिए । गत फागुन २१ गते सम्पन्न निर्वाचनका क्रममा म्यादी प्रहरीका लागि खरिद गरिएको पोशाकमा अनियमितता भएको आरोप सत्तारूढ राष्ट्रिय स्वतन्त्र पार्टीका सांसद खगेन्द्र सुनारले उठाएका थिए ।

यही विषयमा सार्वजनिक लेखा समितिले रास्वपा सांसद मनिष झाको संयोजकत्वमा अध्ययन उपसमिति नै गठन गरेर छानबिन अघि बढाएको छ । अर्कोतर्फ, बिचौलियाको आरोपमा अनुसन्धानमा रहेका इनम सापकोटासँग कार्कीको सम्पर्क रहेको विवरण सार्वजनिक भएपछि उनीमाथि थप प्रश्न उठेका थिए । कार्कीले केहीदिन अघि उच्च प्रहरी अधिकारीहरूको आकस्मिक बैठक नै बोलाएर संगठनको व्यावसायिकता र प्रतिष्ठामाथि प्रश्न उठाउने गतिविधिको सामना गर्न एकजुट हुन निर्देशन दिएका थिए ।

प्रहरी संगठनभित्रको असन्तुष्टि र सरकारसँगको बढ्दो दूरीले उनको नेतृत्व थप दबाबमा परेको थियो । सरकारले भने कार्कीलाई कारबाही वा बर्खास्त गरिएको नभई जिम्मेवारी मात्र हेरफेर गरिएको दाबी गरेको छ । सरकारका प्रवक्ता तथा शिक्षामन्त्री सस्मित पोखरेलले कार्कीलाई प्रधानमन्त्रीको विशेष सुरक्षा सल्लाहकार बनाइएको जानकारी दिँदै जिम्मेवारी परिवर्तनलाई कारबाहीका रूपमा बुझ्न नहुने बताएका छन् । उनले यस विषयमा रास्वपाबाट समेत निर्देशन आएको उल्लेख गरेका छन् ।

अब प्रहरीको नेतृत्व सम्हाल्ने मनोज केसीसामु संगठनभित्रको एकता कायम गर्ने, प्रहरीको व्यावसायिकता र निष्पक्षता जोगाउने तथा विवादित खरिद प्रकरण र बिचौलियासँग जोडिएका विषयको निष्पक्ष अनुसन्धान सुनिश्चित गर्ने चुनौती छ । नेतृत्व परिवर्तनले प्रहरीभित्र देखिएका समस्या समाधान गर्छ वा विवादको केन्द्रमा रहेका विषयलाई थप राजनीतिक बहसमा तान्छ भन्ने प्रश्न पनि उत्तिकै महत्वपूर्ण छ ।

थप समाचार

भारतीय विदेश सचिव विक्रम मिस्री दुई दिने औपचारिक भ्रमणमा, बालेनलाई…

३४ औँ प्रहरी महानिरीक्षक बने डा. मनोज केसी

सरकारबिरुद्ध विपक्षी दल फेरि एक ठाउँ, संसद अधिबेशन आह्वानको माग

निष्पक्ष छानबिन गर्न सम्बन्धित निकायलाई सर्बोच्चको पूर्ण बैठकको चुनौती

गगनले भने– तर्साउने धेरै आए, तर्सिने बानी परेन

प्रधानमन्त्रीले भने– एक, दुई जना उम्किन्छु भनेर सपना नदेखे हुन्छ