३४ औँ प्रहरी महानिरीक्षक बने डा. मनोज केसी

काठमाडौं । ठूला र राजनीतिक रूपमा संवेदनशील अपराधको अनुसन्धानमा नेतृत्वदायी भूमिका निर्वाह गरेका प्रहरी अधिकारी डा. मनोज केसी अब नेपाल प्रहरीको सर्वोच्च नेतृत्वमा पुगेका छन् । नक्कली भुटानी शरणार्थी प्रकरणदेखि फेक रेस्क्यु, क्रिप्टोकरेन्सी र आर्थिक अपराधको अनुसन्धानमा अनुभव हासिल गरेका केसीलाई सरकारले ३४ औँ प्रहरी महानिरीक्षक बनाएको छ । शैक्षिक योग्यता, अनुसन्धान क्षमता र अन्तर्राष्ट्रिय अनुभवसमेत भएका केसीको काँधमा अब प्रहरी संगठनको साख जोगाउने र अनुसन्धानलाई राजनीतिक प्रभावमुक्त बनाउने जिम्मेवारी आएको छ ।

अनुसन्धानमा खारिएका, शैक्षिक रूपमा अब्बल र चुनौतीपूर्ण आपराधिक घटनाको अनुसन्धानमा नेतृत्वदायी भूमिका निर्वाह गरेका प्रहरी अधिकारी डा. मनोज केसी नेपाल प्रहरीको सर्वोच्च नेतृत्वमा पुगेका छन् । सरकारले प्रहरी महानिरीक्षक दानबहादुर कार्कीलाई जिम्मेवारीबाट हटाएर एआईजी केसीलाई ३४ औँ प्रहरी महानिरीक्षक नियुक्त गरेसँगै प्रहरी संगठनको कमान्ड अब अनुभवी अनुसन्धान अधिकृतको हातमा पुगेको छ । नवनियुत्त आईजीपी केसीलाई गृहमन्त्री सुधन गुरुङ दज्र्यानी चिन्ह प्रदान गरेका छन् । यसअघि गृहसचिवले आईजीपीलाई दज्र्यानी चिन्ह प्रदान गर्दै आएका थिए ।

जिम्मेवारी सम्हालेपछि केसीले आफ्नो जिम्मेवारी पूरा गर्ने प्रतिबद्धता व्यक्त गरेका छन् । केसीलाई दज्र्यानी चिन्ह प्रदान गरेपछि जिम्मेवारी पूरा गर्न निर्देशन दिएका छन् । खासगरी प्रहरी र नागरिकबीचको सम्बन्ध सुमधुर बनाउनुपर्नेमा मन्त्री गुरुङले जोड दिएका छन् । अपराध अनुसन्धानदेखि संगठन व्यवस्थापनसम्मको अनुभव हासिल गरेका केसीका लागि अब प्रहरीको व्यावसायिकता, निष्पक्षता र जनविश्वासलाई थप सुदृढ बनाउने अवसर र चुनौती दुवै छन् । केसीको नाम प्रहरी वृत्तमा विशेषगरी नक्कली भुटानी शरणार्थी प्रकरणको अनुसन्धानसँग जोडिएर चर्चामा आएको हो ।

नेपाली नागरिकलाई नक्कली भुटानी शरणार्थी बनाएर अमेरिका पठाउने भन्दै ठगी गर्ने गिरोहविरुद्धको अनुसन्धान अघि बढाउन उनले महत्त्वपूर्ण भूमिका निर्वाह गरेका थिए । लामो समयदेखि अलपत्र रहेको उक्त प्रकरणमा जाहेरी प्रक्रिया अघि बढाउँदै १२ चैत २०७९ मा गिरोहका सदस्य केशव दुलाल, टंक गुरुङ र सानु भण्डारीलाई पक्राउ गरेपछि अनुसन्धानले गति लिएको थियो । त्यसपछि संगठित अपराधको कसुरमा अनुसन्धान विस्तार हुँदै पूर्वउपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाँड र तत्कालीन गृहसचिव टेकनारायण पाण्डेसम्म अनुसन्धानको दायरा पुगेको थियो ।

त्यतिबेला उपत्यका अपराध अनुसन्धान कार्यालयमा एसएसपीका रूपमा कार्यरत केसीकै नेतृत्वको टोली कांग्रेस नेता बालकृष्ण खाँडलाई पक्राउ गर्न उनको निवास पुगेको थियो । राजनीतिक रूपमा संवेदनशील मानिएको उक्त घटनामा अनुसन्धान अघि बढाउँदा उनले व्यावसायिक जिम्मेवारी निर्वाह गरेको चर्चा भएको थियो । तर, यही प्रकरणपछि उनको पोस्टिङ र जिम्मेवारीलाई लिएर पनि विभिन्न राजनीतिक तथा प्रशासनिक वृत्तमा चर्चा चल्यो ।

भुटानी शरणार्थी प्रकरणको दोस्रो चरणको अनुसन्धान सुरु भइरहेका बेला ४ भदौ २०८० मा तत्कालीन सरकारले उनलाई जिम्मेवारीबाट हटाएको थियो । त्यसपछि पनि उनले प्रहरी सेवामा विभिन्न जिम्मेवारी सम्हाल्दै आफ्नो अनुभवलाई निरन्तरता दिए । केसीको अनुभव भुटानी शरणार्थी प्रकरणमा मात्रै सीमित छैन । केन्द्रीय अनुसन्धान ब्युरो (सीआईबी) मा रहँदा उनले नक्कली हवाई उद्धार अर्थात् फेक रेस्क्यु ठगी, स्मार्ट टेलिकमसँग जोडिएको ठगी, धितोपत्र तथा बिमा ठगी, क्रिप्टोकरेन्सी अपराध र सरकारी जग्गा अतिक्रमण तथा हिनामिनाजस्ता जटिल विषयको अनुसन्धानमा नेतृत्व गरेका थिए ।

अपराध अनुसन्धान विभागको प्रमुखका रूपमा पनि उनले काम गरेका छन् । प्रहरी प्रधान कार्यालयको प्रदेश समन्वय विभाग, विशेष ब्युरो, प्रहरी एकेडेमी, महिला बालबालिका तथा ज्येष्ठ नागरिक निर्देशनालय र विभिन्न जिल्ला प्रहरी कार्यालयमा काम गरेको अनुभव उनीसँग छ । संगठनभित्र संस्थागत सुधार र प्रहरी शिक्षाको विकासमा समेत केसीको योगदान रहेको छ । नेपाल प्रहरीमा पहिलोपटक सुरु गरिएको स्टाफ कलेजका संस्थापक निर्देशक रहेका उनले प्रहरी एकेडेमीमा कार्यरत रहँदा प्रहरी विज्ञानमा स्नातकोत्तर तहको पाठ्यक्रम निर्माणमा भूमिका खेलेका थिए ।

थप समाचार

भारतीय विदेश सचिव विक्रम मिस्री दुई दिने औपचारिक भ्रमणमा, बालेनलाई…

सरकारले गर्यो प्रहरी महानिरीक्षक दानबहादुर कार्कीलाई बर्खास्त

सरकारबिरुद्ध विपक्षी दल फेरि एक ठाउँ, संसद अधिबेशन आह्वानको माग

निष्पक्ष छानबिन गर्न सम्बन्धित निकायलाई सर्बोच्चको पूर्ण बैठकको चुनौती

गगनले भने– तर्साउने धेरै आए, तर्सिने बानी परेन

प्रधानमन्त्रीले भने– एक, दुई जना उम्किन्छु भनेर सपना नदेखे हुन्छ