सहकारी क्षेत्रमा देखिएका समस्या समाधान गछौं : मन्त्री श्रेष्ठ

ललितपुर । भूमि व्यवस्था, सहकारी तथा गरिबी निवारण मन्त्री रञ्जिता श्रेष्ठ चौधरीले सहकारी क्षेत्रमा देखिएका समस्या समाधान गर्न सरकार गम्भीर रहेको बताएकी छन् । शुक्रवार राष्ट्रिय सहकारी महासंघ लिमिटेड, राष्ट्रिय सहकारी बैंक लिमिटेड र नेपाल बचत तथा ऋण केन्द्रीय सहकारी संघ लिमिटेडको संयुक्त आयोजनामा काठमाडौँमा भएको सहकारीका विद्यमान समस्याः सुधार सुझाव कार्यशालाको कार्यक्रममा मन्त्री श्रेष्ठले यस्तो बताएकी हुन् ।

उनले सहकारी क्षेत्रमा देखिएको समस्याको पहिचान गरी समाधानको लागि सरकारले गठन गरेको “सहकारी क्षेत्र सुधार सुझाव कार्यदल, २०८०” ले काम गरिहेकोले त्यसको आधारमा सरकारले सहकारी क्षेत्रको समस्या समाधान गर्ने बताइन । पछिल्लोे समय बैंक तथा वित्तीय क्षेत्रमा तरलताको समस्या सुधार हुँदै गएकोले पनि सहकारीको समस्यामा समाधान हुँदै जाने जिकिर गरिन ।

मन्त्री श्रेष्ठले बजारमा हल्ला भए जस्तो सहकारीमा समस्या नरहेको उल्लेख गर्दै केही सहकारी संस्थाका कारण सिंगो सहकारी अभियानलाई असर परेको उल्लेख गरिन । सहकारी क्षेत्र सुधार सुझाव कार्यदल,२०८० का संयोजक मा। जयकान्त राउतले कार्यदलले पाएको कार्यदेशको आधारमानै सहकारी क्षेत्रत्रको समस्यालाई समाधान गर्ने बताए ।

कार्यदलले पहिलो चरण २७ बुँदे सुझाव सरकारलाई बुझाएको भन्दै सहकारी क्षेत्रका सञ्चालक, निक्षेपकर्ता तथा सरोकारवालाहरुको सुझावको आधारमा अन्तिम प्रतिवेदन सरकारलाई हस्तान्तरण गर्ने उल्लेख गरे । भूमि व्यवस्था,सहकारी तथा गरिबी निवारण मन्त्रालयका सचिव गोकर्णमणि दुवाडीले सहकारी संस्थाहरुले सदस्यको विश्वास जित्नको लागि सकारात्मक काम गर्नु पर्ने बताए । सदस्यहरुलाई सहकारीप्रतिको सकारात्मक धारण विकास गर्न जोड दिनु पर्ने बताए ।

सहकारी विभागका रजिस्ट्रार नमराज घिमिरेले सहकारीको पैसा बचतकर्तामा मात्रै लगानी गर्ने सहकारीको सिद्धान्त भए पनि सञ्चालकहरुले अनुत्पादक क्षेत्रमा लगानी गर्दा अहिलेको समस्या आएको बताए । अहिले साना तथा ठुला सबै प्रकारका सहकारीमा समस्या रहेको सहकारीका सञ्चालकहरु सदस्यहरुसँग टाढा हुँदा पनि समस्या विकराल हुँदै गएको उल्लेख गर्दै संस्थाका सञ्चालकले बचतकर्तालाई बचतको सुरक्षा छ भनेर प्रतिबद्धता जाहेर गर्नु पर्ने बताए ।

विश्वका विकसित मुलुकको विकास सहकारीबाट नै भएको बताउँदै उनले नेपालमा पनि सहकारी अभियान अगाडि बढाउन आवश्यक रहेकोमा जोड दिए । राष्ट्रिय सहकारी महासंघका अध्यक्ष मिनराज कँडेलले सहकारी क्षेत्रमा देखिएका समस्या बिस्तारै कम हुँदै गएको बताए । केही सहकारीको नियतका कारण राम्रो व्यवस्थापन भएका सहकारीमा पनि समस्या देखिएको भन्दै अब बिस्तारै ती समस्याहरु न्यूनीकरण हुँदै गएको उल्लेख गरे ।

राष्ट्रिय सहकारी बैंकका अध्यक्ष के.बी. उप्रेतीले विश्वमा देखा परेको आर्थिक मन्दीको असर नेपालमा पनि देखा पर्दा सबै क्षेत्र समस्यामा परेको बताए । आर्थिक मन्दीको असर नेपालका प्रायः सबै क्षेत्रमा देखा परिरहेको र सहकारीलाई बचतसँग नभएर उत्पादनसँग जोड्न आवश्यक रहेकोमा उनले जोड दिए । केही सञ्चार माध्यमहरुले गलत कुराको बढी प्रचार–प्रसार गरेकोले सहकारीमा समस्या बढेको उनको गुनासो छ ।

थप समाचार

राजनीतिमा आउने कुलमानको तयारी, उर्जामन्त्रीले अनावश्यक दुख दिएको आरोप

कार्यवाहक प्रधानमन्त्री सिंहले भेटे राष्ट्रपति पौडेल

७ दमकल प्रयोग गरेर नियन्त्रणमा लिइयो चन्द्रागिरिमा भएको आगलागी

साँखुको सलम्बुटारस्थित आश्रयस्थलमा टिपर छिर्‍यो, तीन जनाको मृत्यु

भिट्ठामोड सुख्खा बन्दरगाह निर्माणमा सहयोग गर्ने प्रचण्डको प्रतिबद्धता

हमासलाई ट्रम्पको चेतावनी‘बन्दी रिहा नगरेमा एउटा पनि सदस्य बाँकी रहने…