धादिङको धार्केमा २ वटा ट्रकबाट किसानले खोसे मल,प्रहरीले रोक्नै सकेनन्

खोज पत्रिका आइतवार, २०७९ असार ५, ०१ :३१ बजे

काठमाडौं । धादिङको धार्केमा रासायनिक मल बोकेर काठमाडौंतर्फ आउँदै गरेको दुई वटा ट्रकबाट किसानले मल खोसेर लगेका छन् । मल बोकेको ट्रकलाई राजमार्गछेउमा रोकेर किसानले मल खोसेर लगेका हुन ।

अवैध रासायनिक मल लिएर आएको ट्रकलाई राजस्व अनुसन्धान विभागले शुक्रबार राति धादिङको चरौंदीबाट नियन्त्रणमा लिएको थियो । सशस्त्र प्रहरीको बलको सुरक्षामा काठमाडौंतर्फ ल्याइँदै गरेका बेला किसानहरुले ट्रक रोकेर मल खोसेका थिए ।

शनिबार दिउँसो मल बोकेको ट्रक काठमाडौंतर्फ जाँदै गरेको सूचना पाएपछि धार्केमा राजमार्गमा ४ देखि ५ सय किसान जम्मा भएका थिए । मल बोकेको ट्रक आइपुग्नेवित्तिकै किसानले ट्रक रोकेर मल खोसाखोस गरेका थिए ।

सशस्त्र प्रहरीले किसानहरुमाथि कुटपिट गरेपनि भिड नियन्त्रणमा गाह्रो परेको थियो । किसानले धेरैजसो मल लगिसकेपछि प्रहरी घटना स्थलमा आएको थियो । त्यसपछि उसले मललाई नियन्त्रणमा लिएको छ ।