११ महिनामा रोजगारीमा जानेको संख्या ६ लाख ८२ हजार नाघ्यो

खोज पत्रिका सोमवार, २०८१ असार ३, १८ :५१ बजे

काठमाडौं । चालु आर्थिक वर्षको ११ महिनामा वैदेशिक रोजगारीमा जानेको संख्या ६ लाख ८२ हजार पुगेको छ । चालु आर्थिक बर्ष २०८०–८१ को साउनदेखि जेठ मसान्तसम्म वैदेशिक रोजगारीमा ६ लाख ८२ हजार ३८६ जना नेपाली गएका छन् । यो नयाँ र पुनः श्रम स्वीकृति लिएर जाने दुवैको संख्या हो ।

जेठमा मात्र ७२ हजार ६ सय ८१ जना रोजगारीका लागि विदेश गएको वैदेशिक रोजगार विभागले जनाएको छ । जसमा ६४ हजार ८ सय ८६ पुरुष र ७ हजार ९ सय ७५ महिला छन् । गत वैशाखमा ७० हजार व्यक्ति रोजगारीको खोजीमा विदेश गएका थिए ।

गत आर्थिक वर्ष २०७९-८० मा वैदेशिक रोजगारीमा जानेको संख्या ७ लाख ७१ हजार पुगेको थियो । चैतयता प्रत्येक महिना ७० हजार हाराहारीमा नेपालीहरू वैदेशिक रोजगारीमा गइरहेको विभागको तथ्याङ्क छ ।

साउनसम्म वैदेशिक रोजगारीमा जानेको संख्या साढे सात लाख पुग्ने देखिन्छ । रोजगारीको प्रमुख गन्तव्य खाडी मुलुक बनेको छ । चालु आर्थिक वर्षको जेठ मसान्तसम्म यूएई पहिलो श्रम गन्तव्य बनेको छ । यूएईका लागि जेठसम्म १ लाख ७४ हजार ९१७ जनाले श्रम स्वीकृति लिएका छन् ।

त्यस्तै जेठसम्म ८७ हजार जना मलेसिया गएका छन् । जेठमा मात्र यूएईमा २० हजार ४२४ जना गएका छन् । त्यस्तै मेलेसियामा ८ हजार ७५२ जना पुगेका छन् । कतारमा ११ हजार ९७३, साउदी अरबमा १३ हजार ३६६ र कुवेतमा ३ हजार ४३२ जना रोजगारीका लागि पुगेका छन् ।