भूकम्प प्रभावितहरुसँग पुगेन त्रिपाल, रातभर खुल्ला आकाशमा बस्न बाध्य

खोज पत्रिका मङ्लबार, २०८० कार्तिक २१, ०८ :१० बजे

जाजरकोट । भूकम्पबाट सबैभन्दा बढी मानवीय क्षति व्यहोरेको जाजरकोटमा मानिसहरु खुला आकाशमुनि रात काट्न बाध्य भएका छन् । चिसोमा बाहिर बस्नु पर्दाको दुःख त छँदैछ, उनीहरुलाई खाद्यान्नको समेत अभाव भएको छ ।

सदरमुकाम आसपास थुप्रै पक्की घर भए पनि शुक्रबार गएको ६.४ रेक्टर स्केलको भूकम्पले घरहरु चर्किएका छन् । त्यसमाथि सोमबार पनि ५.८ रेक्टर स्केलको भूकम्प जाँदा थप क्षति हुँदा मानिसहरु बाहिर निस्किएका छन् । जाजरकोट सदरमुकामको गैरीखाली बजारमा रहेको खाली स्थानमा गर्भवती श्रीमती र १० दिनको बच्चा त्रिपाल नै नटाँगेर सुतिरहेका छन् ।

खुला आकाशमुनि बसेका थुप्रैले राहत नपाएको गुनासो गरेका छन् । तीमध्ये अधिकांशको भनाइ आफूहरु स्थानीय वासिन्दा नभएकाले सहयोग नपाएको भन्ने थियो । जिल्ला प्रहरी कार्यालय, खलङ्गा नजिकै रहेको चोकमा समेत स्थानीयवासी खुला चउरमा बसिरहेका छन् । प्रहरी कार्यालयका भवन पनि चर्किएकाले सुरक्षाकर्मी आफैं पनि बाहिर बसेका छन् ।

जिल्ला सदरमुकाम खलङ्गामा मात्रै ४२ जनाको मृत्यु भएको छ । शुक्रबार मध्यराति आएको भूकम्पमा परेर अधिकांश ढुंगामाटोले बनाइएका घरहरुमा क्षति पुगेको छ । सदरमुकामका अधिकांश स्थानीय वासिन्दा सुर्खेत, काठमाडौं वा अन्यत्रतिर छन् ।