अवैध संरचना हटाउन ललितपुर महानगरले दियो ३५ दिने अल्टिमेटम

खोज पत्रिका बुधबार, २०७९ अशोज ५, ०८ :२२ बजे

काठमाडौं । ललितपुर महानगरपालिकाले अवैध संरचना हटाउन अल्टिमेटम दिएको छ । महानगरपालिकाले ३५ दिने सार्वजनिक सूचना प्रकाशन गर्दै सार्वजनिक जग्गा मिचेर बनाइएका अवैध संरचना हटाउन निर्देशन दिएको हो ।

ललितपुर महानगरपालिका क्षेत्रभित्र नक्सा स्वीकृत बिना, मापदण्ड विपरित निर्माण भएका संरचनाहरु, सार्वजनिक जग्गा, सडक, फुटपाथ, चोक, पेटी अतिक्रमण गरि निर्माण भएका स्लोप, टप, रयाम्प, सिँढी लगायतका संरचना हटाउन सूचनामा भनिएको छ।

त्यस्तै नक्शा स्वीकृत गर्दा पार्किङ प्रयोजनमा स्वीकृती लिएर अन्य प्रयोजनमा प्रयोग भएका संरचनाहरू लगायत सार्वजनिक जग्गा अतिक्रमण गरि निर्माण गरेका संरचना तोकिएको समयावधिभित्र सुधार गर्न वा हटाउन पनि सूचित गरिएको छ।

तोकिएको समयभित्र सार्वजनिक जग्गा अतिक्रमण गरेर बनाइएका संरचना नहटाएर महानगर आफैँले हटाउने चेतावनी दिइएको छ। काठमाडौं महानगरले अतिक्रमित संरचना हटाउन थालेपछि बिभिन्न स्थानीय सरकार पनि तातिएका छन् ।