सहकारीमा नयाँ नियमः वार्षिक २ करोड बढी कारोबार गर्ने सहकारीमा सञ्चालक कर्मचारी हुन नपाउने

खोज पत्रिका सोमवार, २०७८ फाल्गुन २, २१ :५५ बजे

काठमाडौं । सहकारी विभागले आइतबार एकीकृत निर्देशन जारी गर्दै वार्षिक २ करोड भन्दा माथिको कारोबार गर्ने सहकारी संस्थाका सञ्चालक समिति, लेखा समिति तथा अन्य उपसमितिमा रहेको व्यक्ती सहकारी संस्थाको कर्मचारी हुन नपाउने ब्यबस्था गरेको छ । हालै सहकारी विभागले सहकारी सञ्चालनमा कडाई गर्दे आएको छ ।

विभागले जारी गरेको निर्देशनअनुसार अब सहकारी संस्थाको सञ्चालक समिति, लेखा समिति तथा अन्य उपसमितिमा रहेको व्यक्ती र उनीहरुका एकाघर परिवार अथवा संगोलका व्यक्तीहरु पनि सहकारी संस्थाको कार्यकारी प्रमुख वा अन्य कुनैपनि कर्मचारीको रुपमा काम गर्न बन्देज लगाएको छ । यस्तो ब्यवस्थाले आफु र आफ्ना आफन्त सञ्चालक र कर्मचारी राखेर सञ्चालन भईरहेका विषेश गरी शहरी क्षेत्रका सहकारीहरु भने समस्यामा परेका छन् ।

सहकारी विभागले यहि फागुन १ गते आइतबार एकीकृत निर्देशन जारी गर्दै यस्तो ब्यबस्था गरेको हो । सहकारी संस्थामा हुने गरेका अनियमितता, उनुपयक्त ठाउँ वा ब्यक्तिमाथिको कर्जा लगानी र हुने जोखिम तथा बचतकर्ताको रकम हिनामिना लगायतको समस्या समाधान गर्नको लागी विभागले सहकारी ऐन २०७४ को दफा ४१ को उपदफा ४ मा रहेको व्यवस्था अनुसार नै एकीकृत निर्देशन जारी गरेको जनाएको छ । यस्तो ब्यबस्थाले अब सहकारीको कर्मचारीको हैसियतले सञ्चालक समिति, लेखा समिति तथा अन्य उप समितिको बैठकमा समेत भाग लिन रोक लगाएको छ ।