मुख्यमन्त्री बन्ने भएपछि राजेन्द्र राईले मदिराको चुस्कीसँगै साटे खुशीयाली

खोज पत्रिका मङ्लबार, २०७८ कार्तिक १६, ११ :१८ बजे

काठमाडौं । प्रदेश १ को मुख्यमन्त्री बन्ने निश्चित भएपछि नेकपा एकिकृत समाजवादीका नेता राजेन्द्र राईले सोमबार साँझ खुसीयाली बनाएका छन् । ६८ दिनको कार्यकाल सकेर प्रदेश १ का मुख्यमन्त्री भिम आचार्यले राजीनामा दिएपछि राईले प्रदेश प्रमुखसमक्ष दाबी पेश गरेका छन् । दाबी पेश गरेसँगै मुख्यमन्त्री बन्ने पक्का भएपछि आफन्त र केही साथीहरुसँग राईले खुसीयाली साटेका हुन् । तर, मुख्यमन्त्री बन्न लागेका राईले मदिराको चुक्सीले खुसीयाली मनाउदा सामाजिक सञ्जालमा आलोचना भएको छ ।

मुख्यमन्त्रीमा निश्चिततासँगै इटहरीको महंगो होटल इन टुरिष्टमा पार्टी आयोजना भएको हो । पार्टीमा शुभेच्छुकले उपलब्ध गराएको केक काटेर राईले खुशी साटेका थिए । केकमा राईलाई ‘प्रदेश १ को मुख्यमन्त्री बनेकोमा बधाइ’ लेखिएको थियो । उनले स्याम्पेन पनि फोडे । पार्टीमा राईकी पत्नी शोभा पाठक पनि सहभागी थिइन् । राई दम्पत्तिले संयुक्तरुपमा मदिराको चुस्की लिएको भिडियोमा सामाजिक सञ्जालमा भाइरल भएको छ । पार्टीमा करिब एक दर्जन व्यक्तिको उपस्थिति देखिन्छ ।

नेकपा एसका अध्यक्ष माधवकुमार नेपालले केन्द्र सरकारमा आफनो पार्टी सहभागी भएपछि निर्देशन दिँदै मदिरा नपिउन र बद्नाम हुने कुनै काम नगर्न सल्लाह दिएका थिए । तर, राईले अध्यक्षको निर्देशन बिर्सेर मदिरा पार्टीमा रमाएको भिडियो यतिबेला भाइरल नै भएको छ । मदिराले नै खुसीयाली बनाएपछि सर्वसाधारणमा के सन्देश जाला भन्ने प्रश्न पनि उब्जिएको छ ।