फोन रिसिभ नगर्ने मन्त्री र मन्त्रीका पिए,सुचना लुकाउनै माहिर

खोज पत्रिका बिहिबार, २०७७ अशोज १, १८ :४० बजे

नेपाली उखान छ सिओ बनेर छिर्ने तरवार भएर निष्किने । हो, यस्तै यस्तै प्रबृत्ति मौलाएको छ नेपाली राजनीतिमा । परिवारबादबाट ग्रसित नेपालको राजनीति अहिले भने अन्यौलताको भूमरीमा फसिरहेको छ । नफसोस पनि कसरी वडा अध्यक्ष बन्ने हैसियत नराख्नेलाई मन्त्री बनाइदिएपछिको परिणाम हो यो । नम्बर थिच्न नजान्नेलाई आइफोन भिराएपछि बिचरा, फोन आएको पनि थाहा पाउँदैनन् फोन गर्न पनि जान्दैनन् साहेद मोवाइलको स्क्रिनका अक्षरहरु पनि राम्रोसँग चिन्दैनन् । अनि कसरी गर्छन् आम जनताका म्यासेजको रिप्लाई ।

काठमाडौं छिर्दा चप्पल लगाएकाहरु सिंहदरबार पुग्दा प्राडो, पँजेरो अनि सुरक्षाकर्मी अगुवा पछुवा लिएर हुँइकिने थालेपछि त मोवाइलको आवाज पनि सुनेनछन् क्यारे । त्यसैले त दर्जनौ म्यासेज पठाउँदा सेकेण्ड नै पिच्छे मोवाइलमा घण्टी बज्दा पनि माननिय ज्यू को फोन रिप्लाई हुँदैन । हामी यो कुनै ब्यक्ती बिशेषलाई केन्द्रीत गर्न गइरहेका छैनौं । यो त सर्वत्र उहाँहरुकै नेता कार्यकर्ताको आवाज हो । सञ्चारकर्मी भएका नाताले हामीले पनि समाचारको पुष्ट्याई गर्नका लागि तारन्तार रुपमा फोन र म्यासेज नगरेका होइनौं ।

यीनै महासय चुनाव नजिकिदा,निर्वाचित हुँदा,मन्त्री बन्दा र सत्ताको रस चुसिरहँदा आफूले गरेका उपलब्धीका बारेमा हामी सञ्चारकर्मीलाई बारम्बार फोन गरी समाचार बनाइदिनुपर्यो भन्दै नथाकेका इतिहास हामीसँग पनि नभएका होइनन् । तर, बिडम्बना अहिले परिस्थिति फेरिएको छ । महासय त दुई तिहाई सरकारका मन्त्री पो बन्नुभएको छ । गल्ती हाम्रै थियो, हामीले विश्वास गरेका हाम्रा नभई राम्रा मान्छेलाई फोन गरेका थियौं । तर, उहाँ त माननिय पो होइसिन्छ । त्यसैले त उनका आसे पासेले पनि साहेद हाम्रो फोन उठाउन उचित ठानेनन् र बारम्बार काटिरहे । उनलाई पनि कहाँ फुर्सद थियो होला कसैलाई ठेक्का मिलाइदिनुछ । दशैं तिहार नजिकिदो छ खर्च जुटाउनुछ । बिचरा हामी कलमजीवी पो पर्यौं ।

न हामी ठेक्का लिएर करोडौं मन्त्री ज्यूलाई दिन सक्छौं न त उँहाका आसेपासेले चाहे जस्तो दशैं खर्च नै दिन सक्छौं । त्यसैले पनि उहाँहरु र उहाँहरुका आसेपासेको प्राथमिकतामा हामी नपर्नु स्वभाविक हो । त्यसैले त हामी जे सक्छौं त्यहि गर्दैछौं । यहि हात र मुखले मन्त्री ज्यूहरुका सकरात्मक कार्यको गुनगान हामीले नगाएका होइनौ । तर, सरकारी ढुकुटीको ब्रम्हलुट गरी आफन्त र आसेपासेलाई पक्षपोषण गर्न थालेपछि त हाम्रो कलम पनि कहाँ रोकिन्छ र ? हामी यत्ति आग्रह गर्न चाहन्छौं । फोन मोवाइल सामाजिक सञ्जालहरु हामी सबैका सम्पर्क शुत्र हुन् । तर, यिनको उचित सदुपयोग गर्न नचाहदा हामी यत्ति लेख्न बाध्य भएका हौं ।