थारु समुदायको बिशेष पर्व माघी,पाँच दिनसम्म धुमधामका साथ मनाइदैं

खोज पत्रिका बिहिबार, २०७७ माघ १, १६ :१३ बजे

काठमाडौं । माघी पर्व थारू समुदायको विशेष पर्व हो । थारु समुदुायले नयाँ वर्षका रूपमा स्नान, दान, एवं खानपिन र रमाइलो गरेर माघीपर्व मनाउँदैछन् । सूर्य उत्तरायण प्रवेश गर्ने दिन आज थारू समुदायको नयाँ वर्ष अर्थात् माघीपर्व पर्दछ । यस पर्वलाई ठाउँअनुसार विभिन्न नाम पनि दिने गरिएको छ । आजदेखि पाँच दिनसम्म धुमधामका साथ तराई क्षेत्रमा यस पर्व मनाइन्छ । बिहानै जलाशयमा गई स्नान, पूजा गरी ठूलाबडाकहाँ गएर आशीर्वाद लिने परम्परा थारू समुदायको छ । बेलुका घरमा ठूला मुढा बालेर धुनी जगाउँछन् ।

धुनीको चारैतिर घरपरिवार र पाहुना बसेर खानपिन गर्छन् । यस दिनदेखि पाँच दिनसम्म उनीहरुले आफू स्वतन्त्र भएको अनुभव गर्छन् । यस अवसरमा सक्नेहरु चारधाम जाने र नसक्नेले नजिकको तीर्थमा गई गच्छेअनुसार दीनदुःखीलाई दान गर्ने चलन छ । कुनै कारणवश श्राद्ध कर्म रोकिएकाहरुले आजैका दिन श्राद्ध गर्नुपर्छ भन्ने मान्यता रहेको छ ।

तिलले स्नान गर्नु, तिलको तेल घस्नु, पितृलाई तिलयुक्त जल दिनु, तिल हवन गर्नु, तिल दान गर्नु र तिल खानु गरी जम्मा छ प्रकारले तिलको प्रयोग यस दिन जसले गर्छ त्यो असफल हुँदैन भन्ने विश्वास थारू समुदायमा छ । आजको दिन गाउँमा सबै मिलेर मुखिया छनोट गर्ने चलन छ । आजको दिनदेखि करिब एक महिना थारु समुदायले घर–घरमा सखिया नाच देखाउने गर्दछन् ।

क्याटेगोरी : जीवनशैली, देश/दुनियाँ, ब्रेकिंग न्युज, समाचार
ट्याग : #थारु समुदाय, #माघी पर्व