विपदका घटनामा परेर बैशाखयता ४ सय २ जनाको मृत्यु

खोज पत्रिका बिहिबार, २०७७ अशोज १५, १७ :४५ बजे

काठमाडौं । बैशाख १ गतेदेखि असोज १४ गतेसम्म विभिन्न विपदका घटनामा परेर ४ सय २ जनाको मृत्यु भएको छ । साढे ५ महिनाको अवधिमा बाढी, पहिरो र चट्याङ लागेर त्यति धेरै जनाको मृत्यु भएको राष्ट्रिय विपद जोखि न्यूनीकरण तथा व्यवस्थापन प्राधिकरणले जनाएको छ ।

विपदमा परेर अहिलेसम्म ४ सय ३९ जना घाइते भएका छन् भने १ सय १ जना बेपत्ता भएका छन् । पहिरोमा परेर मृत्यु हुनेको संख्या २ सय २५ बेपत्ता हुनेहरुको संख्या ६४ र घाइते हुनेहरुको संख्या २२३ रहेको छ ।

त्यस्तै, बाढीमा परेर मृत्यु हुनेहरुको संख्या ४२, घाइतेको संख्या ११ र बेपत्ता हुनेहरुको संख्या ३७ रहेको छ भने चट्याङ लागेर मृत्यु हुनेहरुको संख्या ६५ जना रहेको छ । चट्याङ लागेर २०५ जना घाइते भएका छन् । प्राधिकरणका अनुसार गत २४ घण्टामा देशभर ९ वटा विपदका घटना भएका छन् ।