बाँकेको ठुरियामा गाडी दुर्घटना हुँदा १२ जनाको मृत्यु, २१ घाइते

खोज पत्रिका सोमवार, २०७७ जेष्ठ १९, १३ :०३ बजे

बाँके । जिल्लाको ठुरिया जंगलमा गाडी दुर्घटना हुँदा १२ जनाको मृत्यु भएको छ । आइतबार राति १२ बजे भएको दुर्घटनामा ११ जनाको घटनास्थलमै र एक जनाको अस्पतालमा उपचारका क्रममा मृत्यु भएको हो । मृतकमध्ये ११ जना पुरुष र एक जना महिला छिन् । घाइते २० जना पुरुष र एक महिलाको भेरी अस्पतालमा उपचार भइरहेको छ । घाइते मध्ये पाँच जनाको अवस्था गम्भीर रहेको अस्पतालले जनाएको छ ।

दुर्घटनामा परेकाहरु भारतका विभिन्न शहरबाट आएका थिए । नेपालगञ्ज नाकाबाट उद्धार गरेर उनीहरुलाई सल्यान पठाईँदै थियो । ना ५ ख ५९९५ नम्बरको हाइस गाडीमा ३३ जना सल्यानतर्फ जाँदै थिए ।

पूर्व–पश्चिम राजमार्ग अन्तर्गत बाँकेको ठुरिया जंगलमा रोकिराखेको बा ४ ख ९०६४ नम्बरको ट्रकमा ठोक्किँदा हाइस दुर्घटनामा परेको हो । मृतकहरुको सनाखत हुन बाँकी छ । उनीहरु दांग, रोल्पा, सल्यान र रुकुमका रहेको बताइएको छ ।

क्याटेगोरी : प्रमुख समाचार, ब्रेकिंग न्युज, समाचार
ट्याग : #गाडी दुर्घटना