किन बढ्यो प्रधानमन्त्री बालेन र कांग्रेस सभापति गगनबीच टकराव ?

काठमाडौं । प्रधानमन्त्री बालेन्द्र शाह र कांग्रेस सभापति गगनकुमार थापाबीचको राजनीतिक भिडन्त चर्किएको छ । इनम सापकोटा प्रकरण, पत्रकार पक्राउ र प्रेस स्वतन्त्रताको विषयले चर्किएको विवादमा दुवै नेताले एकले अर्कोलाई कटाक्ष गर्दै एकअर्कालाई चुनौती दिइरहेका छन् । फेसबुकका स्टाटसदेखि राजनीतिक मञ्चसम्म देखिएको यो टकरावले सत्ता र प्रतिपक्षबीचको सम्बन्ध थप तनावपूर्ण बनाएको छ । उता, रवि लामिछानेसँग गगनको बढ्दो निकटताले पनि राजनीतिक वृत्तमा नयाँ चासो थपेको छ । इनम सापकोटा प्रकरणपछि प्रधानमन्त्री बालेन्द्र शाह र नेपाली कांग्रेसका सभापति गगनकुमार थापाबीचको राजनीतिक टकराव देखिएको छ ।

पत्रकार पक्राउ र सञ्चारमाध्यममाथि भएको धरपकडलाई लिएर कांग्रेसले सरकारको कार्यशैलीप्रति कडा आपत्ति जनायो । पत्रकार सम्मेलन गर्दै सभापति थापाले पत्रकार पक्राउ गर्ने र सञ्चार क्षेत्रलाई त्रसित पार्ने सरकारी रवैया कुनै पनि हालतमा स्वीकार्य नहुने स्पष्ट पारे । लोकतन्त्रमा प्रेस स्वतन्त्रता र अभिव्यक्ति स्वतन्त्रता कुण्ठित गर्ने प्रयास सह्य नहुने भन्दै उनले सरकारको कदममाथि प्रश्न उठाए । तर, यो विवाद पत्रकार पक्राउमा मात्रै सीमित छैन ।

पछिल्लो समय प्रधानमन्त्री बालेन्द्र शाह र कांग्रेस सभापति थापाबीच सार्वजनिक अभिव्यक्तिसँगै सामाजिक सञ्जालमार्फत पनि आरोप–प्रत्यारोप चल्न थालेको छ । कांग्रेसको आधिकारिकता प्राप्त गर्न आफूले १८ करोड रुपैयाँ दिएको भन्ने प्रचार प्रधानमन्त्री बालेनको सचिवालयबाटै फैलाइएको थापाको गम्भीर आरोप छ । यही आरोप र १८ करोडको चर्चाले दुई नेताबीचको विवादलाई थप चर्काएको छ । गगनले पत्रकार सम्मेलन नै गरेर सरकारको आलोचना गरेपछ आइतबार प्रधानमन्त्री बालेनले फेसबुकबाट ‘सही समय आएपछि सबैको गलत समय आउँछ । एक–दुई जना उम्किन्छु भनेर सपना नदेखे हुन्छ ।’ भन्ने स्टाट्स लेखे ।

त्यसको भोलिपल्ट सोमबार साँझ ठीक ६ बजे कांग्रेस सभापति गगन थापाले फेसबुकमा ‘अहिले ठीक १८ः०० बजेको छ । तर्साउने धेरै आए, तर्सिने बानी परेन ।’ भन्दै प्रधानमन्त्री बालेनलाई जवाफ फर्काए । यद्यपि, दुवैले एकअर्काको नाम प्रत्यक्ष उल्लेख गरेका छैनन् । तर, स्टाटसको भाषा र समयले यी अभिव्यक्तिलाई एकअर्काप्रतिको राजनीतिक कटाक्षका रूपमा हेरिएको छ । यसरी प्रधानमन्त्री र प्रमुख प्रतिपक्षी दलका सभापतिबीचको विवाद अब पत्रकार सम्मेलन र सार्वजनिक अभिव्यक्तिमा मात्रै सीमित नभई फेसबुक वारसम्म पुगेको छ ।

अर्कोतर्फ, गगन र राष्ट्रिय स्वतन्त्र पार्टीका सभापति रवि लामिछानेबीच भने पछिल्लो समय सम्बन्ध सुधार हुँदै गएको देखिन्छ । केही समयअघिसम्म राजनीतिक प्रतिस्पर्धीका रूपमा रहेका यी दुई नेताबीच पटक–पटक छलफल र संवाद हुन थालेको छ । आपसी कुराकानी र राजनीतिक भेटघाटसँगै दुवै नेताका महाधिवेशनमा एकअर्काको सहभागिताले पनि सम्बन्धमा आएको परिवर्तनलाई संकेत गर्छ । रविसँग संवाद र निकटता बढ्दै जाँदा गगनले प्रधानमन्त्री बालेनप्रति भने आक्रामक अभिव्यक्ति दिन थालेका छन् ।

यसले राष्ट्रिय राजनीतिमा नयाँ राजनीतिक समीकरण र सम्बन्धको बहससमेत सिर्जना गरेको छ । एकातिर रविसँग संवादको ढोका खुला राख्ने र अर्कोतिर बालेन सरकारको कार्यशैलीमाथि कडा प्रश्न उठाउने गगनको पछिल्लो राजनीतिक भूमिकालाई चासोका साथ हेरिएको छ । रास्वपाको नेतृत्वसँग संवाद कायम राख्दै सरकार प्रमुखको भूमिकामा रहेका बालेनलाई प्रश्न गर्नु गगनको राजनीतिक प्राथमिकताको भिन्नता पनि हुन सक्छ ।

अर्कोतर्फ, बालेन नेतृत्वको सरकारलाई प्रश्नविहीन रूपमा अघि बढ्न नदिने र कांग्रेसलाई प्रभावकारी प्रतिपक्षीका रूपमा स्थापित गर्ने चुनौती पनि गगनसामु छ । सरकारका निर्णय, कार्यशैली र अभिव्यक्तिमाथि उनले निरन्तर प्रश्न उठाइरहेका छन् । प्रधानमन्त्रीलाई प्रश्न सोध्न आफू नभाग्ने र नडराउने उनको उद्घोष केवल व्यक्तिगत चुनौती नभई सरकारको जवाफदेहितामाथि दबाब सिर्जना गर्ने राजनीतिक सन्देश पनि हो । तर, प्रश्न उठाउने र जवाफ दिने नाममा राजनीति व्यक्तिगत आरोप–प्रत्यारोपमै सीमित भयो भने प्रेस स्वतन्त्रता र सरकारको जवाफदेहिताजस्ता मूल मुद्दा ओझेलमा पर्ने जोखिम छ ।

थप समाचार

भारतीय विदेश सचिव विक्रम मिस्री दुई दिने औपचारिक भ्रमणमा, बालेनलाई…

३४ औँ प्रहरी महानिरीक्षक बने डा. मनोज केसी

सरकारले गर्यो प्रहरी महानिरीक्षक दानबहादुर कार्कीलाई बर्खास्त

सरकारबिरुद्ध विपक्षी दल फेरि एक ठाउँ, संसद अधिबेशन आह्वानको माग

निष्पक्ष छानबिन गर्न सम्बन्धित निकायलाई सर्बोच्चको पूर्ण बैठकको चुनौती

गगनले भने– तर्साउने धेरै आए, तर्सिने बानी परेन