भारतीय विदेश सचिव विक्रम मिस्री दुई दिने औपचारिक भ्रमणमा, बालेनलाई निम्तो दिने तयारी

खोज पत्रिका बुधबार, २०८३ कार्तिक १९, १९ :४८ बजे

काठमाडौं । प्रधानमन्त्री बालेन्द्र शाहको प्रस्तावित भारत भ्रमणलाई केन्द्रमा राखेर नेपाल र भारतबीच उच्चस्तरीय कूटनीतिक संवाद अघि बढेको छ । प्रधानमन्त्री शाहको भारत भ्रमणको तयारीका क्रममा भारतीय विदेश सचिव विक्रम मिस्री दुई दिने औपचारिक भ्रमणमा काठमाडौं आइपुगेका हुन् । उनको भ्रमणलाई प्रधानमन्त्रीको सम्भावित भारत भ्रमणको एजेन्डा तय गर्ने, द्विपक्षीय सम्बन्धका प्राथमिकता पहिचान गर्ने र दुई देशबीचको राजनीतिक संवादलाई थप सक्रिय बनाउने प्रयासका रूपमा हेरिएको छ ।

काठमाडौं अवतरण गरेलगत्तै मिस्रीले परराष्ट्रमन्त्री शिशिर खनालसँग शिष्टाचार भेटवार्ता गरेका छन् । परराष्ट्र मन्त्रालयमा भएको भेटमा मन्त्री खनालले नेपाल–भारतबीचको घनिष्ठ सम्बन्धले आगामी दिनमा थप उचाइ लिने विश्वास व्यक्त गरेका छन् । दुई देशबीचको ऐतिहासिक सम्बन्धलाई आपसी हित र सहकार्यका आधारमा अघि बढाउनुपर्नेमा भेटका क्रममा जोड दिइएको मन्त्रालयले जनाएको छ । मिस्रीले अर्थमन्त्री डा. स्वर्णिम वाग्लेसँग पनि भेटवार्ता गरेका छन् ।

भेटमा नेपाल र भारतबीच आर्थिक सहकार्यका विभिन्न विषयमा छलफल भएको अर्थमन्त्रीको सचिवालयले जनाएको छ । दुई देशबीच व्यापार, लगानी, पूर्वाधार विकास र आर्थिक साझेदारीका सम्भावनालाई अघि बढाउने विषयमा छलफल हुनु प्रधानमन्त्रीको प्रस्तावित भ्रमणको आर्थिक एजेन्डासँग पनि जोडिएको छ । भेटमा अर्थसचिव डा. घनश्याम उपाध्यायसहित दुवै देशका सम्बन्धित अधिकारी सहभागी थिए । यसैगरी, मिस्रीले परराष्ट्र सचिव अमृतबहादुर राईसहितको नेपाली प्रतिनिधिमण्डलसँग विस्तृत छलफल गरेका छन् ।

उक्त छलफलमा द्विपक्षीय सम्बन्धका समग्र पक्षसँगै भोटेकोशी बाढीबाट क्षतिग्रस्त पूर्वाधार पुनर्निर्माण र पुनःस्थापनाको विषयले पनि स्थान पाएको छ । बाढीबाट प्रभावित नेपालका पूर्वाधार पुनर्निर्माणमा सहयोग गर्न भारत तयार रहेको मिस्रीले बताएका छन् । नेपालले पुनर्निर्माण तथा पुनःस्थापनाको काम अघि बढाउँदा आवश्यक सहयोग र परियोजनाबारे थप छलफल गर्न भारत इच्छुक रहेको उनको भनाइ छ । नेपाल र भारतबीचको सम्बन्ध विशिष्ट रहेको उल्लेख गर्दै मिस्रीले सुखद् र कठिन दुवै परिस्थितिमा दुई देश एकअर्काका साझेदार रहँदै आएको बताएका छन् ।

भोटेकोशी बाढीपछिको कठिन अवस्थामा भारतले उपलब्ध गराएको सहयोगको स्मरण गर्दै उनले आगामी दिनमा पनि सहकार्यलाई निरन्तरता दिने प्रतिबद्धता व्यक्त गरेका छन् । मिस्रीको भ्रमणलाई प्रधानमन्त्री बालेन्द्र शाहको प्रस्तावित भारत भ्रमणसँग जोडेर हेरिएको छ । प्रधानमन्त्री शाहको सम्भावित भ्रमणका क्रममा भारतीय प्रधानमन्त्री नरेन्द्र मोदीसँग भेटवार्ता हुने अपेक्षा गरिएको छ ।

भ्रमणमा सीमा व्यवस्थापन, ऊर्जा सहकार्य, व्यापार तथा पारवहन, पूर्वाधार विकास र दुई देशबीचका अन्य आपसी चासोका विषयले प्राथमिकता पाउने सम्भावना छ । त्यसअघि नै भारतीय विदेश सचिवको नेपाल भ्रमण हुनुलाई उच्चस्तरीय भेटवार्ताका लागि आवश्यक कूटनीतिक गृहकार्यका रूपमा हेरिएको छ । नेपालमा नयाँ सरकार गठन भएपछि भारतसँगको सम्बन्धलाई कसरी अघि बढाउने भन्ने विषय पनि चासोका साथ हेरिएको छ ।

एकातिर राजनीतिक तहमा विश्वासको वातावरण बनाउने र अर्कोतिर आर्थिक तथा विकास साझेदारीलाई परिणाममुखी बनाउने चुनौती सरकारसामु छ । मिस्रीको भ्रमणमा भएका भेटवार्ता र छलफलले प्रधानमन्त्रीको सम्भावित भारत भ्रमणको आधार तयार पार्ने अपेक्षा गरिएको छ । दुई दिने भ्रमण सम्पन्न गरी मिस्री कात्तिक १९ गते नयाँदिल्ली फर्कने कार्यक्रम छ । उनको भ्रमणपछि प्रधानमन्त्री शाहको भारत भ्रमणको मिति, एजेन्डा र उच्चस्तरीय भेटवार्ताबारे थप स्पष्टता आउने अपेक्षा गरिएको छ ।

क्याटेगोरी : जनगुनासो, प्रमुख समाचार, राजनीति, विचार/लेख, समाचार