कसले कुट्यो कार्यकक्षमै भ्रष्टचार बिरोधी उपसचिव प्रेम सञ्जेललाई

खोज पत्रिका शनिबार, २०७७ साउन १७, १७ :२८ बजे

काठमाडौं । भ्रष्टचार बिरोधी छवि बनाएका उपसचिव प्रेम सञ्जेल कार्यकक्षमै कुटिएका छन् । श्रम तथा रोजगार कार्यालय विराटनगरका प्रमुख सञ्जेलमाथि आफ्नै कार्यकक्षमा २ कर्मचारीले कुटपिट गरेका हुन् । मोरङ प्रहरी प्रमुख प्रहरी उपरीक्षक सन्तोष खड्काले कार्यालयकै कामको विषयलाई लिएर विवाद उत्पन्न भएपछि श्रम कार्यालयका प्रमुख सञ्जेलमाथि आक्रमण भएको जानकारी दिएका छन् । घटना शुक्रबार दिउँसोको भएपनि शनिबार मात्र घटना बाहिरिएको हो । जिल्ला प्रहरी कार्यालयमा अहिले सोही विषयमा छलफल भइरहेको बताइएको छ ।

कुटपिटमा संलग्न भएको आरोपमा प्रहरीले दुई महिला कर्मचारीलाई नियन्त्रणमा लिएको छ । प्रहरीले कार्यालयका सहयोगी कर्मचारी नेत्र भट्टराई र मेनुका सापकोटा कोइरालालाई नियन्त्रणमा लिएको हो । उनीहरु दुबै करारका कर्मचारी हुन् । कुटपिटमा संलग्नलाई नियन्त्रणमा लिएर घटनाको अनुसन्धान सुरु गरिएको छ । कुटपिटबाट सञ्जेलको शरीरका विभिन्न भागमा चोट लागेको बताइएको छ ।