प्रदेश २ मा ५० हजार भिटिएम सहितका सामग्री खरिद गरिने

दिपक अर्याल मङ्लबार, २०७७ जेष्ठ २७, ०२ :११ बजे

धनुषा । कोरोना महामारी नियन्त्रणका लागि प्रदेश २ का मुख्यमन्त्री लालबाबु राउत नेतृत्वको निर्देशक समितिले प्रदेशमा थप चार वटा पिसिआर मेसिन खरिद गर्ने निर्णय गरेको छ । निर्देशक समितिको सोमबार बसेको बैठकले पिसिआर मेसिन संञ्चालनमा रहेको जनकपुर, विरगंज र राजविराजको ल्याबमा एउटा–एउटा र रौतटहको गौर अस्पतालमा नयाँ ल्याब राख्नेगरी चारवटा पिसिआर मेसिन खरिद गर्ने निर्णय गरेको छ । समितिले परीक्षण तथा उपचारको लागि आवश्यक जनशक्ति व्यवस्थापन गर्ने निर्णय समेत गरेको छ ।

यस्तै, समितिले प्रदेशमा कोरोना परीक्षणलाई तीब्रता दिन थप ५० हजार भिटिएम खरिद गर्ने निर्णय गरेको छ । परीक्षणमा प्रयोग हुने रिएजेन्ट लगायतका सामग्री समेत खरिद गर्न समितिले समाजिक विकास मन्त्रालयलाई निर्देशन दिएको छ । निर्देशक समितिले तेस्रो मुलुकबाट आउने नागरिकलाई प्रदेश प्रवेश विन्दुमा नेपाली सेनाले होल्डिङ्ग एरिया बनाई व्यवस्थापन गर्ने र काठमाडौंदेखि तोकिएको क्वारेन्टाइन सम्म जाँदाको खाना , खाजा आर्दि खर्च प्रदेश सरकारले ब्यहोर्ने निर्णय पनि गरेको छ ।

प्रदेश सरकारले स्वदेश आउन चाहने नागरिकहरुको समन्वय र सहयोग गर्ने जिम्मेवारी आन्तरिक मामिला तथा कानून मन्त्री ज्ञानेन्द्र कुमार यादवलाई दिएको छ । लकडाउनको कार्यान्वयन तथा व्यवस्थापनका लागि स्थानीय तह, स्थानीय प्रशासन र निजी क्षेत्रका संघ संस्थाहरुको सहकार्य आवश्यक रणनीति लागु गर्ने निर्णय समेत गरिएको छ । यसअघि सोमबार विहान बसेको पिसिएमसीको बैठकले दिएको सुझावको आधारमा निर्देशन समितिले यस्तो निर्णयहरु गरेको बताइएको छ ।

क्याटेगोरी : देश/दुनियाँ, प्रमुख समाचार, राजनीति, समाचार
ट्याग : #प्रदेश २