कांग्रेसको एक वर्षभित्र महाधिवेशन गर्न दबाब बढाउनुसः शेखर कोइराला

खोज पत्रिका आइतवार, २०८१ पुस १४, ०० :१६ बजे

काठमाडौं । नेपाली कांग्रेसका नेता डा. शेखर कोइरालाले नेकपा एमालेका अध्यक्ष केपी शर्मा ओली नेतृत्वको सरकारले अपेक्षा गरेअनुसारको काम गर्न नसकेको आरोप लगाएका छन् ।

महोत्तरीमा आयोजित क्षेत्रीय सम्मेलन उद्घाटन कार्यक्रममा उनले हरेक दुई दुई महिनामा सरकार परिवर्तन हुने अवस्था आएपछि राजनीतिक स्थायित्वका लागि एमालेसँग मिल्न बाध्य भएको बताए । नेता कोइरालाले भ्रष्टाचार बढिरहेको भन्दै सरकारले सुशासन दिन नसकेको जिकिर गरे ।

नेता कोइरालाले सरकारमा भएका मन्त्रीहरुले सहकार्य गरेर अगाडि बढे पनि बाहिर भएकाहरुले प्रतिस्पर्धीको भावना राखेर अघि बढ्नुपर्नेमा जोड दिए । कांग्रेसले आगामी निर्वाचनमा एक्लै चुनाव लडेर जित्ने अवस्था बनाउनुपर्नेमा उनले जोड दिए ।

उनले १५ औं महाधिवेशन एक वर्षभित्र नहुने संकेत देखिएको भन्दै नेतृत्वलाई दबाब दिन नेता कार्यकर्तालाई आग्रह गरे । नेता कोइरालाले भने, ‘तपाईंहरु यहाँबाट जाँदा ढुक्क भएर जानुस् । तपाईंहरु कसैको डर, धाक धम्कीबाट नडराउनुस् । तपाईंहरुको राजनीतिक संरक्षण म गर्छु । अन्याय हुन नदिने बाचा म गर्छु । म पक्कै गर्छु ।’