शक्ति र सत्ताको दुरुपयोग गरेर बजेट विनियोजन भयोः प्रमुख सचेतक रोकाय

खोज पत्रिका सोमवार, २०८१ असार १७, १९ :१९ बजे

काठमाडौं । राष्ट्रिय सभामा नेपाली काँग्रेसका प्रमुख सचेतक कृष्णबहादुर रोकायले विनियोजन विधेयकका शिर्षक मापदण्ड, सिद्धान्त र प्राथमिकताको विपरित रहेको बताएका छन् । सोमवारको राष्ट्रिय सभा बैठकमा उनले बजेट मन्त्रीहरुले आफूखुशी ल्याएको बताएका हुन ।

उनले बजेटको मूल्य मान्यतामा नै त्रुटी भएको बताए । मन्त्रीहरुले आफ्नो आफ्नो मन्त्रालयमा प्राप्त बजेटको अधिकांश हिस्सा आफ्नै जिल्ला, निर्वाचन क्षेत्रमा लैजाने कुराले ज्यादा अपरिपक्व, गैरजिम्मेवार, दुरुपयोग गरेको पुष्टि भएको प्रमुख सचेतक रोकायको भनाई छ । बजेट विनियोजन शक्ति र सत्ताको दुरुपयोग गरेर ल्याएको उनले जिकिर गरे ।

उनले भने, ‘आर्थिक वर्ष २०८१\०८२ का बजेटका सिद्धान्त र प्राथमिकतालाई टेकेर सोका आधारमा यो बजेट आयो की आएन भन्नेकुरा मुख्य हो । बजेट निर्माण गर्दा कुनै न कुनै मापदण्डमा टेकेर निर्माण गरिन्छ । तर अहिलेका विनियोजनका विभिन्न शिर्षक हेर्दा बिना मापदण्ड, सिद्धान्त र प्राथमिकताको विपरित मन्त्रीहरुले आफूखुशी बजेट ल्याएको देखियो ।

यो बजेटलाई समग्रतामा हेर्दा मूल्य मान्यतामा नै त्रुटी देखियो । मन्त्रीहरुले आफ्नो आफ्नो मन्त्रालयमा प्राप्त बजेटको अधिकांश हिस्सा आफ्नै जिल्ला, निर्वाचन क्षेत्रमा लैजाने कुराले ज्यादा अपरिपक्व, गैरजिम्मेवार, दुरुपयोग गरेको पुष्टि भएको छ । यो शक्ति र सत्ताको ठाडो दुरुपयोग हो । बजेटको मुल मान्यतामा नै गम्भीर त्रुटी देखियो । ’

रोकायले बजेट मन्त्रालयगत विनियोजनमा गैरजिम्मेवार र लज्जस्पद स्थिति देखिएको बताएका थिए ।