अमेरिकीद्वारा सन्दीप लामिछानेलाई भिसा दिन अस्वीकार, सामाजिक सञ्जालमा आलोचना

खोज पत्रिका बुधबार, २०८१ जेष्ठ ९, १९ :०७ बजे

काठमाडौं । नेपालस्थित अमेरिकी दूतावासले क्रिकेटर सन्दीप लामिछानेलाई भिसा दिन अस्वीकार गरेको छ । बुधबार लामिछानेले सामाजिक सञ्जाल फेसबुकमार्फत आफ्नो भिसा अस्वीकृत भएको जानकारी गराएका छन् । नेपाल क्रिकेट संघको निर्णयअनुसार उहाँ वेस्टइन्डिज र अमेरिकामा यही जुनमा हुने टी–२० विश्वकप खेल्न जाने तयारीमा छन् ।

नेपाली टोली यसअघि नै विश्वकप खेल्न गइसकेको छ । उनले फेसबुकमा अमेरिकी दूतावासले सन् २०१९ मा जस्तै फेरि एक पटक भिसा दिन अस्वीकार गरेकोले विश्वकपमा खेल्ने चाहना पूरा हुन नसकेको भन्दै माफ गरिदिन आग्रह गरे । यस्तै, लामिछानेलाई भिसा नदिएकोमा व्यापक आलोचना भएको छ ।

नेपाली सामाजिक सञ्जाल प्रयोगकर्ताहरूले अमेरिकी दूतावासको सामाजिक सञ्जालमा व्यापक आलोचना गरिरहेका छन् । हालसालै अमेरिकी दूतावासले सार्वजनिक गरेको क्लर्क र क्यासियरको जागिरको विज्ञापनको सूचनामा फेसबुक प्रयोगकर्ताहरूले व्यापक आलोचना गरेका हुन ।