राष्ट्रपति रामचन्द्र पौडेललाई हृदयघात, सहिद गंगालाल हृदय रोग केन्द्रमा एन्जिओप्लाष्टी गरियो

खोज पत्रिका मङ्लबार, २०८० जेष्ठ ३०, १९ :५० बजे

काठमाडौं । राष्ट्रपति रामचन्द्र पौडेललाई हृदयघात भएको छ । मंगलबार बिहान असहज महसुस भएपछि राष्ट्रपति पौडेल शहीद गंगालाल राष्ट्रिय हृदय केन्द्र पुगेका थिए ।

पौडेलको मुटुको दाहिनेतर्फ एउटा नसा ७० प्रतिशत बन्द भएको पाइएको अस्पतालले जनाएको छ । राष्ट्रपतिको मुटुको दाहिनेतिरको नसाबाट तार हालेर जाली खोलेर रगत सञ्चालन गरिएको छ ।

पौडेल छाती दुख्ने, भारी हुने, गाह्रो हुने लगायत समस्या भएपछि अस्पताल पगेको बताइएको छ । चिकित्सकका अनुसार एनजिओप्लास्टी गरेपछि मुटुले कस्तो काम गर्छ भनेर दुई दिन हेर्नुपर्ने भन्दै अस्पतालमै भर्ना गरिएको छ ।

अस्पतालले राष्ट्रपतिको स्वास्थ्य अवस्था सामान्य रहेको भन्दै भोलीसम्म डिस्चार्ज गरिने बताएको छ । निर्देशक डा. चन्द्रमणि अधिकारी नेतृत्वको टोलीले राष्ट्रपति पौडेलको शल्यक्रिया गरेको थियो । राष्ट्रपति पौडेलले शनिबार पनि गंगालालमै नियमित परीक्षण गराएका थिए ।

क्याटेगोरी : प्रमुख समाचार, राजनीति, समाचार
ट्याग : #रामचन्द्र पौडेललाई हृदयघात