पूर्वमन्त्री टोपबहादुर रायमाझी सम्पर्कविहिन, पक्राउ गर्न खोज्दै प्रहरी !

खोज पत्रिका बिहिबार, २०८० बैशाख २१, १४ :१४ बजे

काठमाडौं । नेकपा एमालेका सचिव एवं पूर्व ऊर्जामन्त्री टोपबहादुर रायमाझीलाई प्रहरीले खोजी गरिरहेको बताएको छ । यसअघि भैरहवाबाट रायमाझी पक्राउ परेको भनिएपनि उनी सम्पर्कविहिन भएको बताइएको छ ।

नेपाली युवालाई भुटानी शरणार्थी बनाएर अमेरिका पठाउने भन्दै लाखौं असूली गरेको गिरोहलाई सहयोग गरेको आरोपमा पक्राउ पूर्जी जारी भएपछि प्रहरीले उनको खोजी जारी राखेको छ ।

काठमाडौंमा बुधबार पक्राउ पूर्जी जारी हुँदा उनी भने अर्घाखाँचीको महेन्द्र विद्योदय माध्यमिक विद्यालयको हिरक महोत्सवमा विशेष अतिथिका रुपमा सहभागी भइरहेका थिए ।

सभामुख देवराज घिमिरेसँग भैरहजवाबाट काठमाडौं आउने तयारीमा रहेका रायमाझी स्थलमार्गबाट काठमाडौं आउने बताएका थिए । तर, प्रहरीले पक्राउ गर्ने सुइको थाहा पाएपछि उनी सम्पर्कविहिन भएका छन् ।

केही प्रहरी अधिकृतहरुलाई आफै प्रहरीसमक्ष आउने बताएका रायमाझी सम्पर्कविहिन भएका हुन । रायमाझीको नक्कली शरणार्थी बनाउने गिरोहका सदस्य केशव दुलाल र सानु भण्डारीसँग निकट सम्बन्ध देखिएको छ ।