दुई मेयर बालेन साह र हर्क साम्पाङको पहिलो भेटघाट, एकले अर्कोलाई लगाइदिए सिलाम साक्मा

खोज पत्रिका मङ्लबार, २०७९ चैत्र २१, १७ :३३ बजे

काठमाडौं । काठमाडौं महानगरपालिकाका मेयर बालेन साह र धरान उपमहानगरपालिकाका मेयर हर्क साम्पाङबीच पहिलो पटक भेटवार्ता भएको छ । स्थानीय तहको चुनावपछि चर्चामा आएका दुई मेयर साह र साम्पाङको पहिलो पटक भेट भएको हो । खानेपानी योजना माग्न काठमाडौं आएका साम्पाङले राष्ट्रिय सभागृहको सम्पर्क कार्यालयमा पुगेर मेयर साहलाई भेटेका हुन् ।

साम्पाङ धरानका उपमेयर अइन्द्रविक्रम बेघासहितको टोली लिएर महानगपालिका पुगेका थिए । दुई जनाले एक अर्कामा ‘सिलाम साक्मा’ लगाइदिई स्वागत र सम्मान गरेका छन् । बाँसको कप्टेरोमा विभिन्न रङका धागो बुनेर चारकुने सिलाम साक्माको छेउमा फुर्को बनाइएको हुन्छ । सिलाम साक्मा मुन्धुम र लिम्बू परम्पराको महत्वपूर्ण संस्कारहरूमा प्रयोग गरिन्छ । लिम्बू जातिको परम्परा र संस्कृतिमा आधारित यसको प्रयोग अरू जातिले पनि गर्दै आएका छन् ।

सामाजिक सञ्जालमा एकले अर्कोलाई कडा टिप्पणी गर्दै आएका दुवै मेयरबीच सौहार्द वातावरणमा छलफल भएको थियो । साम्पाङले फेसबुकमा भेटघाटको तस्विर पोस्ट गरेर भेट भएको बताएका हुन । बालेनविरुद्ध साम्पाङले पटक–पटक स्टाटस लेखेर काम गर्न नसकेको भन्दै आलोचना गरेपनि उनीहरुको सम्बन्ध चिसिएको थियो । दुवैबीचको भेटले तिक्तता मेटिएको सन्देश दिएको छ ।