नेकपा एमाले र माओवादी केन्द्रका महासचिव पराजित

खोज पत्रिका बिहिबार, २०७९ मंसिर ८, १४ :४८ बजे

काठमाडौं । कम्युनिस्ट पार्टीमा व्यवस्थापकीय र सांगठनिक हिसाबले निक्कै शक्तिशाली मानिने पद महासचिव हो । तर, एमाले र माओवादीका महासचिव संसदीय निर्वाचनमा पराजित भएका छन् । नेकपा एमालेका महासिचव शंकर पोखरेल दाङ २ मा माओवादी केन्द्रकी रेखा शर्मासँग पराजित भए ।

लमजुङमा माओवादी केन्द्रका महासचिव देवप्रसाद गुरुङ एमालेका उपमहासचिव पृथ्वीसुब्बा गुरुङसँग पराजित भएका छन् । गतवर्ष भएको दुबै पार्टीको महाधिवेशनबाट महासचिवको रूपमा उदाएका थिए । तर, दुवै नेताले संसदीय चुनावमा भने हार बेहोरेका हुन् ।

दाङमा एमालेका महासचिव पोखरेललाई माओवादीकी शर्माले १ सय ९६ मतको अन्तरले पराजित गरिन । शर्माले २६ हजार ८ सय ७७ मत प्राप्त गर्दा एमाले महासचिव पोखरेलले २६ हजार ६ सय ८१ मतमात्रै प्राप्त गरेका थिए । लमजुङमा एमाले उपमहासचिव गुरुङले ३४ हजार ९ सय ६९ मत प्राप्त गरेर जित हासिल गर्दा माओवादी महासचिव गुरुङ ३ हजार १ सय ८८ मतान्तरले पराजित भए ।

माओवादी महासचिव गुरुङले ३१ हजार ७ सय ८१ मतमात्रै ल्याएका थिए । एमाले महासचिव पोखरेल यसअघि लुम्बिनी प्रदेशका मुख्यमन्त्री थिए । माओवादी महासिचव गुरुङ भने माओवादीको प्रमुख सचेतकको रूपमा संघीय संसदमा सक्रिय भएका थिए ।