सुर्खेत २ बाट नेपाली कांग्रेसका हृदयराम थानी निर्वाचित

खोज पत्रिका बुधबार, २०७९ मंसिर ७, ०८ :१७ बजे

काठमाडौं । सुर्खेत क्षेत्र नम्बर २ मा नेपाली कांग्रेसका उम्मेदवार हृदयराम थानी निर्वाचित भएका छन् । कुल खसेको ७६ हजार ३ सय ५२ मतमध्ये थानीको पक्षमा ३४ हजार ६ सय २५ आएको छ ।

उनका निकटतम प्रतिस्पर्धी नेकपा एमालेका जिल्ला अध्यक्ष अमृत कुमार बीसीलाई ५ हजार ६७ मतान्तरले पराजित गरे । एमालेका बीसीले २९ हजार ५ सय ५८ मत प्राप्त गरे । थानीले योसँगै तीन पटक संसदीय निर्वाचनमा जित निकालेका छन् । ०७४ मा नेकपा एमालेका नवराज रावतसँग पराजित भएका थिए ।

हारको बदला यो पटक थानीले गठबन्धनको बलमा लिएका छन् । ०७४ मा रावतले ३७ हजार ४ सय ४७ मत ल्याएर निर्वाचित हुँदा थानीले २८ हजार ६४६ मत प्राप्त गरेका थिए । थानी यसअघि ०५६ र ०७० सालका यही क्षेत्रबाट निर्वाचित भएका थिए । उनी सहकारी तथा गरिवी निवारण मन्त्री भइसकेका नेता हुन् ।

क्याटेगोरी : प्रमुख समाचार, राजनीति, समाचार
ट्याग : #हृदयराम थानी निर्वाचित