रवि लामिछानेले घोषणा गरे राष्ट्रिय स्वतन्त्र पार्टी,निर्वाचन क्षेत्र भने टुंगो लागेन

खोज पत्रिका मङ्लबार, २०७९ असार ७, १४ :४३ बजे

काठमाडौं । राजनीतिमा होमिएका रवि लामिछानेले राष्ट्रिय स्वतन्त्र पार्टी घोषणा गरेका छन् । काठमाडौंको राष्ट्रिय सभामा एक कार्यक्रमका बीच लामिछानेले प्रधानमन्त्री र मुख्यमन्त्रीको चुनाव प्रत्यक्ष हुनु पर्ने मागसहित नयाँ पार्टी घोषणा गरेका हुन । स्वतन्त्र उम्मेदवारी घोषणा गरेकाहरुलाई आफ्नो दलमा आउन समेत लामिछानेले अपिल गरेका छन् ।

स्वतन्त्र उम्मेदवारी दिन लागेकाहरुप्रति आफ्नो सम्मान रह‍ेको भन्दै उनले देशभरबाट समानुपातिक मत संकलन गर्न पार्टीमा आउन आग्रह गरे । पार्टीको प्रस्तावित चुनाव चिन्ह घण्टी राखिएको छ । भ्रष्टाचार र मनोमानीमा लिप्त नेताहरुको कानमा घण्टी बजाउने अभियानको थालनी भएको बताइएको छ । पार्टी सदस्यहरुबीच प्रारम्भिक निर्वाचन गरेर मात्र संसदको प्रत्यक्ष तथा समानुपातिक उम्मेदवार चयन गर्ने बताए ।

प्रधानमन्त्री र मुख्यमन्त्रीको उम्मेदवार हुने व्यक्तिले पहिला पार्टीमा चुनाव जित्नु पर्ने अवधारणा अघि सारिएको छ । यसरी पार्टीमा प्रधानमन्त्रीको उम्मेदवार बन्ने निश्चित भएपछि उसले चुनावअघि नै मन्त्रिपरिषदमा जाने सदस्य चयन गर्न पाउने नीति पार्टीमा बनाइएको छ । पार्टीका सदस्यलाई राइट टु रिकलको अधिकार पनि हुने बताइएको छ ।

लामिछानेले पार्टीको कुनै पनि भ्रातृ संगठन नबनाउने र कोही पनि कार्यकर्ता बन्न नपर्ने घोषणाा गरेका छन । सबै सदस्य मात्र हुने र मत हाल्ने बाहेक पार्टीका लागि कुनै काम गर्नु नपर्ने बताइएको छ । लामिछानेको राष्ट्रिय स्वतन्त्र पार्टीका हरेक कमिटीमा ५० प्रतिशत युवा सहभागिता हुने दाबी गरिएको छ । २१ सदस्यीय प्रारम्भिक कमिटी गठन गरिएको बताइएपनि नाम भने सार्वजनिक गरिएको छैन ।