माइतीघरमा प्रर्दशनकारी पूर्व डीआईजी रमेश खरेललाई प्रहरीको स्यालुट

खोज पत्रिका आइतवार, २०७८ माघ २३, ०० :१८ बजे

काठमाडौं । माइतीघरमा शनिबार नयाँ पार्टी गठन गरेका नेपाल प्रहरीका पूर्व डीआईजी समेत रहेका रमेश खरेल पहिलोपटक आन्दोलनका रुपमा प्रदर्शनमा उत्रिए । लिपुलेकमा भारतीय हस्तक्षेप, सार्वजनिक सम्पत्तिको किनबेच र बढ्दो महंगीविरुद्ध खरेल नेतृत्वको नेपाल सुशासन पार्टीले प्रदर्शन गरेको थियो ।

खरेलको पार्टीले विभिन्न विषयमा ३१ बुँदे मागपत्र समेत सार्वजनिक गरेको छ । माइतीघरमा करिब आघा घण्टा प्रदर्शन गरेपछि खरेल त्यहाँ खटिएका प्रहरी अधिकारीहरुसँग भलाकुसारीमा लागे । फिल्डमा खटिएका प्रहरीहरुले खरेललाई स्यालुट गरे अनि खरेलले स्यालुट पनि फर्काए । फौजीमा जर्नेल नेभर रिटार्ड’ भन्ने मान्यता हुन्छ । खरेल अहिले प्रहरी संगठनमा छैनन् ।

उनले बढुवाप्रति असन्तुष्टि जनाउँदै डीआईजीबाटै राजीनामा दिएका थिए। प्रहरी अधिकारीहरुले कुनै दलको नेता भन्दा पनि आफ्नै पूर्वकमाण्डरका रुपमा खरेलप्रति आत्मीयता प्रकट गरेका हुन । खरेलले पनि आफ्ना पूर्वसहकर्मीहरुसँग आत्मीयता दर्शनाउन चिनजान गरेका होलान् । भलाकुसारी गरेपछि खरेल आन्दोलन सकेर फिर्ता भएका थिए ।