बारले रोक्न सक्ला त प्रधानन्यायाधीश जवराको सर्बोच्च प्रवेश

खोज पत्रिका आइतवार, २०७८ कार्तिक २८, १३ :५८ बजे

काठमाडौं । नेपाल बार एशोसिएशनले प्रधानन्यायाधीश चोलेन्द्र शमशेर जवरालाई सर्बोच्च अदालत प्रबेशमा रोक लगाउने तयारी गरेको छ । शुक्रबार प्रबेश गर्न नदिन मुलगेटमै धर्ना बसेको बारको आन्दोलनलाई छल्दै दुई नम्बर गेटबाट प्रबेश गरेका थिए । जवरा सर्बोच्च प्रबेश गरेर इजलास तोकेपनि कुनै सुनुवाई भएको थिएन ।

बार अध्यक्ष चण्डेश्वर श्रेष्ठले आइतबार पनि जबरालाई सर्वोच्च प्रवेशमा निषेध गर्न धर्ना दिने जानकारी दिए । सकेसम्म सर्वोच्च अदालतभित्रै छिरेर गेटमा धर्ना दिन्छौं । गत शुक्रबारजस्तै प्रहरी खटाएर भित्र जान रोके भने बाहिरै धर्नालाई जारी राख्ने श्रेष्ठले बताए । अदालत भवन र नेपाल बार एसोसिएसन भवनबीच सानो गेट छ ।

सर्वोच्च अदालत प्रवेश गर्न कानुन व्यवसायीले प्रयोग गर्ने उक्त गेटलाई शुक्रबार सर्वोच्च प्रशासनले बन्द गरिदिएको थियो । जसका कारण कानुन व्यवसायी सर्वोच्चमा छिर्न पाएनन् र उनीहरू मुख्य गेटमा पुगेर विरोध प्रदर्शन गरेका थिए । बिहान साढे ९ देखि साढे ११ बजेसम्म प्रधानन्यायाधीश जबरा प्रवेश गर्ने प्रवेशद्वारमै धर्ना कार्यक्रम तय गरिएको छ । नेपाल बारले कात्तिक १४ देखि हातमा कालोपट्टी बाँधेर विरोध प्रदर्शन गर्दै आएको छ ।

सर्वोच्च अदालतका २० मध्ये प्रधानन्यायाधीशबाहेक १९ जना न्यायाधीशले पनि उनको राजीनामा मागिरहेका छन् । कात्तिक ८ देखि जबराले बोलाएको फुलकोर्ट बैठक बहिष्कार गर्दै आएका छन् भने जबराले तोकेको इजलास पनि बसेका छैनन् । बन्दीप्रत्यक्षीकरणका मुद्दा मात्र सुनुवाइ गर्दै आएका उनीहरूले त्यसको सुनुवाइमा समेत प्रधानन्यायाधीश जबरासँग इजलासमा बसेका छैनन् ।