चौतर्फी आलोचना र दवावपछि सरकार रुवी खानसँग सहमति गर्न बाध्य, १२ दिनपछि तोडिन आमरण अनसन

खोज पत्रिका मङ्लबार, २०७८ कार्तिक २, २० :०९ बजे

काठमाडौं । सरकारसँग सहमति भएसँगै नेपालगञ्जकी महिला अधिकारकर्मी रुबी खानले आमरण अनसन तोडेकी छन् । नेपालगञ्जको दुई घटनाको छानविनका लागि गृह मन्त्रालयका सहसचिव हिरालाल रेग्मीको नेतृत्वमा ६ सदस्यीय समिति बनाउने सहमतिसँगै उनले अनसन तोडेकी हुन् । उनलाई मानव अधिकार आयोगकी पूर्व सदस्य मोहना अन्सारी र गृह मन्त्रालयका प्रवक्ता फणिन्द्रमणि पोखरेलले जुस खुवाएका छन् ।

समितिमा मुस्लिम समाज चेतना केन्द्रका अध्यक्ष मोहम्मद शेर बागवानलाई पनि राख्ने, ७ दिनभित्र प्रतिवेदन बुझाउने सहमति भएको छ । प्रवक्ता पोखरेलले समितिले स्थलगत अवलोकन गरेर घटनाको छानबिन गर्ने बताए । समितिले दिएको प्रतिवेदनका आधारमा सरकारले दोषीमाथि कारबाही गर्ने उनले आश्वासन दिए । छानबिन समितिलाई ७ दिनको म्याद दिएर प्रतिवेदन बुझाउन निर्देशन दिएको प्रवक्ता पोखरेलले जानकारी दिए ।

अनसन तोडेपछि अधिकारकर्मी रुबी खानले आफुहरुको आन्दोलन दुई महिलाका लागि मात्र नभएर मुलुकभर नै हिंसामा परेका महिलाहरुको न्यायका लागि आन्दोलन भएको बताइन । उनले सरकारले गरेको लिखित सम्झौता अनुसार कारवाही नभए यो भन्दा कडा आन्दोलन गर्ने चेतावनी दिएकी छन् ।

बाँकेमा भएका दुई घटनाका बिषयमा स्थानीय प्रशासनले कुनै चासो नदेखाएको भन्दै महिला अधिकारकर्मी लगाएतको समूह नेपालगन्जबाट २० दिन हिँडेर काठमाडौं आएका थिए । बाँकेको नेवाजी गाउँकी नन्कुन्नी धोबी आफ्नै घरमा मृत फेला परेको घटनामा अनुसन्धान नगरेको र नजिकैको परस्पुरगाउँकी एकल महिला निर्मला कुर्मी हराएको विषयमा पनि प्रहरी र प्रशासनले चासो नदेखाएको भन्दैं उनीहरुले माइतिघरमा धर्ना दिदै आएका थिए ।