नेपाली कांग्रेस पदाधिकारी बैठक

खोज पत्रिका बुधबार, २०७६ कार्तिक ६, १७ :४७ बजे

काठमाडौं ६ कार्तिक । नेपाली कांग्रेस पदाधिकारीको बैठक बुधबार पनि बस्ने भएको छ । बिहिबारका लागि बोलाएको केन्द्रीय कार्यसमिति बैठकमा छलफल हुने एजेण्डाका बारेमा साझा धारणा तय गर्न पदाधिकारी बैठक बस्न लागेको हो । पार्टी सभापति शेरबहादुर देउवाको बूढानीलकण्ठस्थित निवासमा दिउँसो ३ बजे पदाधिकारी बैठक बोलाइएको छ । आगामी मंसिर १४ गते हुन गइरहेको उपनिर्वाचनका बारेमा बैठक केन्द्रित रहने जनाइएको छ । कांग्रेसले उपनिर्वाचनका बारेमै छलफल गरेर पार्टीबाट निर्वाचन लड्ने उमेदवारका बारेमा आवश्यक निर्णय गर्न बिहिबार केन्द्रीय कार्यसमिति बैठक बोलाएको छ । बूढानीलकण्ठमै मंगलबार बसेको कांग्रेस पदाधिकारी बैठकमा पनि उपनिर्वाचनलगायतका बिषयमा अनौपचारिक छलफल भएको थियो ।

क्याटेगोरी : देश/दुनियाँ, प्रमुख समाचार, ब्रेकिंग न्युज, राजनीति, समाचार
ट्याग : #कांग्रेस