काठमाडौं महानगरको बेवास्ता, ‘वायोमिथानेसन प्लान्ट’ अलपत्र

काठमाडौं ९ साउन । २२ घन्टासम्म लोडसेडिङको मार खेपेका नेपालीका लागि कुनै समय फोहोरबाट बिजुली निकाल्ने कुरा निकै चासोको विषय थियो । नेपाल विद्युत प्राधिकरणमा कार्यकारी निर्देशक भएर कुलमान घिसिङ आएसँगै लामो समयको लोडसेडिङ युग चमत्कारिक रुपमा अन्त्य भएपनि फोहोरबाट बिजुली निकाल्ने योजनाबाट भने काठमाडौं महानगरपालिका पछि हटेको छ । काठमाडौं महानगरपालिकाले ०७३ सालमा फोहोरबाट बिजुली निकालेर धेरैलाई चकित बनाएका ‘वायोमिथानेसन प्लान्ट’ अहिले महानगरकै वेवास्ताले बेकामे बनाइएका छन् । काठमाडौं महानगरपालिकाको २० प्रतिशत लगानी र युरोपेली युनियनको ८० प्रतिशत साझेदारीमा १ करोड ८६ लाख खर्चेर ल्याइएको ‘एकीकृत दिगो फोहोरमैला व्यवस्थापन प्रवर्धन’ परियोजना अलपत्र बनाइएको छ । काठमाडौंको फोहोरबाट बिजुली उत्पादन गर्न भन्दै अघि बढाइएको परियोजनाबाट १४ किलोवाट बिजुली निकाल्ने, सो बिजुली महानगरको कार्यलय प्रयोजन, स्थानीय बासिन्दालाई दिइने र टेकुका सडककमा बाल्ने भनिएकोमा अहिले बन्द ‘वायोमिथानेसन प्लान्ट’ भ्रमणमा आउने विद्यार्थी र अन्य अवलोकनकर्ताले रमाइलो मानेर हेर्ने थलोमा सिमित छ । दैनिक ३ मेट्रिक टन जैविक फोहोरलाई मिथानेशन गर्न सक्ने भनिएको प्लान्टले दैनिक १४ किलोवाट बिजुली, ३ सय केजी कम्पोष्ट मल, ९६ केजी ग्यास, १३ हजार लिटर प्रशोधित पानी उत्पादन गर्ने दाबी सहित अन्य शहरले पनि यसको सिको सिक्ने अपेक्षा गरेको महानगरले अरुले सिको नगर्दै आफ्नै योजना तुहाएको छ । के कारण यो परियोजना सञ्चालनमा आउन सकिएन ? हामी काठमाडौं महानगरपालिकाको वातावरण व्यवस्थापन विभागसम्म पुगेका छौँ । योजना अनुसार ग्यास र विद्युत निकाल्न नसकेको स्विकार गर्ने वातावरण विभाग अहिले नीजि कम्पनीलाइ प्लान्ट जिम्मा लगाउने तयारीमा रहेको काठमाडौ महानगरका वातावरण व्यवस्थापन विभाग प्रमुख हरिकुमार श्रेष्ठले बताए । सुरुवाती चरणमा निकै तामझाम देखाएको महानगरले करोडौँको करौडौँको परियोजनालाई व्यवस्थित रुपमा अघि बढाउन नसक्नुमा दिर्घाकालिन योजना र सोचको कमी मुख्य कारक हो । दैनिक ५ सय टन फोहोरमैला उत्पादन हुने काठमाडौं महानगरमा ३ सय टन फोहोरबाट बिजुली निकाल्न सकिने लक्ष्य थियो । आफ्नो लक्ष्य अनुसार काम गर्न नसकेर परियोजनालाई बेबारिसे बनाएको महानगरले अहिलेपनि बन्द रहेको प्लान्ट रेखदेखमा पाँच जना कर्मचारी राख्दै आएको छ । विभिन्न योजना ल्याउने, बजेट खर्चिने अनि कार्यान्वयनमा सधै बेमतलबी बन्ने काठमाडौं महानगरपालिकाले उपत्यकाको दिगो फोहोर व्यवस्थापन कसरी गर्ला ? प्रश्न गम्भिर छ ।

थप समाचार

कांग्रेसमा उठ्यो राज्यमन्त्री कान्छारामलाई हटाइएको विषय

लण्डनको थेम्स नदीमा भेटिएको शव नेपाली विद्यार्थी ओलीकै भएको पुष्टि

सभापतिमाथि लगाएको मुद्दामा दम छैन, सरकारको प्रतिशोध मात्रै होः सोबिता…

भारतले पाकिस्तानबाट हुने आयातमा लगायो पूर्ण प्रतिबन्ध

समाजवादको आधार तयार पारेर मात्रै दुनियाँबाट बिदा हुने संकल्प लिएको…

ओलीले सांसदहरूलाई भनेढुक्क रहनू, हाम्रा सबै नीति सही छन्