सर्वदलीय बैठकः लिपुलेकमा बनाइएको सडक नेपालको भूभाग हो

खोज पत्रिका बुधबार, २०७७ बैशाख ३१, २१ :२८ बजे

काठमाडौं ३१ बैशाख । सर्वदलीय बैठकले भारतले लिपुलेकमा चीनसँग जोड्न बनाइएको सडकको भूभाग नेपालको भएको भन्दै भूमि फिर्ता गर्न तत्काल पहल गर्ने निष्कर्ष निकालेको छ ।प्रधानमन्त्री निवास बालुवाटारमा बसेको सर्वदलीय बैठकले नेपालको पश्चिमी सीमा काली नदी रहेको र कालापानी नेपालकै रहेको भन्दै अतिक्रमण गरेकोमा स्वीकार्य हुन नसक्ने भन्दै तत्काल फिर्ताका लागि पहल गर्न सरकारलाई आग्रह गरेको छ ।
बैठकमा सहभागी सवै दलका प्रतिनिधिहरुले भारतले सडक बनाएको भूभाग नेपालको भन्दै अभिमत प्रकट गरेको र त्यसका लागि प्रभावकारी कुटनीतिक कदम चाल्नुपर्ने निष्कर्ष निकालेको परराष्ट्रमन्त्री प्रदीप ज्ञवालीले बताए । बैठकमा प्रधानमन्त्री केपी ओलीले राष्ट्रहितमा देखिएको एकताको सम्मान गर्दै पुर्खाले बचाएको नेपाललाई बचाउने र त्यसका लागि सवैको साथ चाहिने बताएका थिए ।
प्रधानमन्त्री केपी शर्मा ओलीले सरकार अविलम्ब वार्ता होस् भन्ने पक्षमा रहेको बताए । त्यस्तै उनले भारतसँग आफूहरुले असल सम्बन्ध राख्न चाहेको, कोरोना नियन्त्रणमा भारतले गरेको सहयोग सकारात्मक भएपनि कोरोनाकै बेला भारतले लिपुलेकमा सडक निर्माण गरेर उद्घाटन गर्नु ठिक नभएको प्रधानमन्त्रीको भनाइ थियो । बैठकले कालापानीबाट भारतीय सेना फिर्ता पठाउनुपर्ने निष्कर्ष पनि निकालेको छ । संसदमा प्रतिनिधित्त्व गर्ने दलका नेता र पूर्वप्रधानमन्त्रीहरु सर्वदलीय बैठकमा सहभागी थिए । काँग्रेस सभापति शेरबहादुर देउवाले काली नदी नै नेपालको सीमा भएको भन्दै कालापानी नेपालकै भएकाले त्यो भूमि फिर्ता गर्न पहल गर्न सुझाव दिएका थिए । सन् १८१६ को सुगौलीसन्धीले नेपालको पश्चिमी सिमाना महाकाली नदी कायम गरेको ऐतिहासिक तथ्यनै विद्यमान प्रकरण समाधानको मुल आधार हो । महाकाली नदी पूर्वको लिपुलेक, लिम्पियाधुरा र कालापानी लगायतका भू–भाग नेपालका भएको भन्दै कुटनितिक रुपमा बार्ता गर्न प्रधानमन्त्रीलाई नेताहरुले सुझाव दिएका थिए ।

क्याटेगोरी : प्रमुख समाचार, राजनीति, समाचार
ट्याग : #लिपुलेक बिवाद