रक्तदाता अर्जुन मैनालीले फेसबुकमा स्टाटस लेखेर अमेरिकामा गरे आत्मदाह

खोज पत्रिका सोमवार, २०८० माघ २९, १२ :०२ बजे

काठमाडौं । दुई सय ६ पटक रक्तदान गरेका अर्जुन मैनालीले अमेरिकामा आत्मदाह गरेका छन् । अमेरिकाको नर्थ क्यारोलिनास्थित लट्टा नेचर प्रिजर्भस्थित पार्कमा उनको शव फेला परेको हो । प्रहरीले पूर्ण रुपमा जलेको अवस्थामा शव भेट्टाएको छ । उनी एउटा भाडाको कार लिएर सो पार्कमा पुगेका थिए ।

उनी चढेको कार पनि जलेको छ । कारमा आगो लगाएर आत्महत्या गरेको अनुमान गरिएको छ । मैनालीको शव अहिले नर्थ क्यारोलिना प्रहरीको प्यारामेडिकल टिमले अनुसन्धानका लागि लिएको छ । परिवारलाई प्रहरीले निधन पुष्टि गर्दै पत्र दिएको बताइएको छ ।

मैनालीले फेसबुकमा लामो स्टाटस लेख्दै आफूले आत्महत्या गर्न लागेको बताएका थिए । काभ्रे घर भएका रक्तदाता मैनाली सन् २००७–०८ देखि अमेरिकामा बसोबास गर्न थालेका हुन् । सुरुमा उनी न्यूयोर्कमा बस्ने गर्थे ।

अहिले नर्थ क्यारोलिनामा परिवारसहित बसिरहेका थिए । उनको परिवारमा श्रीमती एक छोरा र एक छोरी छन् । छोरीको विवाह भइसकेको छ भने छोरा सानै छन् । मैनालीले आफ्ना साला र उनकी पत्नीप्रति गुनासो गरेर फेसबुक स्टाट्स लेखेका थिए ।