रुसको आक्रमणमा सेनासहित १ सय ३७ युक्रेनीको मृत्यु

खोज पत्रिका शुक्रबार, २०७८ फाल्गुन १३, ०८ :१० बजे

काठमाडौं । युक्रेनी राष्ट्रपति भोलोदिमेर जेलेन्स्कीले रुसले युक्रेनमाथि गरेको आक्रमणमा १ सय ३७ जना सर्वसाधारण तथा सैनिक जवानको मृत्यु भएको बताएका छन्। रुसले जल, स्थल र हवाई आक्रमण एकैपटक गरेकाले हताहत हुनेको संख्या बढ्दो छ। आक्रमणको निशानामा युक्रेनको राजधानी किभ समेत परेकाले राजधानी छोड्न चाहनेको संख्या बढिरहेको छ ।

आक्रमण शुरु भएकै दिन हिजो एकै दिनमा १ लाखभन्दा बढी नागरिकले राजधानी किभ छोडेको संयुक्त राष्ट्र संघले जनाएको छ। झण्डै ५ लाख मानिस बसोबास गर्ने बन्दरगाह शहर मुरिपोलमा पनि विष्फोट भएको छ। युक्रेनबाट रुसमा सैन्य खतरा भएकोले त्यसको असैन्यीकरण गर्न कार्बाही गर्नु परेको रुसी राष्ट्रपति भ्लादिमिर पुटिनको दाबी छ ।

युक्रेन नव–नाजीहरुले सञ्चालन गरेको आरोप समेत पुटिनको छ। युक्रेनी राष्ट्रपति भोलोदिमिर जेलेन्स्कीले देशमा सैनिक शाशन लागु गरिएको घोषणा गरेका छन्। रुस माथि अमेरिका र बेलायतले नयाँ प्रतिबन्धहरू घोषणा गरेका छन्। जसमा बैंकहरूमा रहेको सम्पत्ति रोक्का गरिने छ। अमेरिकी राष्ट्रपति जो बाइडनले युक्रेन माथि हतारमा गरिएको आक्रमणको रुसलाई महंगो पर्ने बताएका छन्।

क्याटेगोरी : विदेश, समाचार
ट्याग : #भोलोदिमेर जेलेन्स्की, #युक्रेनी