रविविरुद्ध जाहेरी दिने कृष्णप्रसाद सहकारी ठगीमै पक्राउ, ८२ लाख हिनामिनाको आरोप

खोज पत्रिका सोमवार, २०८२ चैत्र ९, २१ :५३ बजे

काठमाडौँ । पोखराको सूर्यदर्शन बचत तथा ऋण सहकारी संस्थाको पीडित बनेर रास्वपा सभापति रवि लामिछानेविरुद्ध जाहेरी दिने कृष्णप्रसाद जैसी पोखराकै धनुष बचत तथा ऋण सहकारी ठगीमा पक्राउ परेका छन् ।

सहकारी रजिस्ट्रारको कार्यालयले गरेको अनुसन्धानमा धनुष सहकारीको ८२ लाख रकम हिनामिनामा उनी संलग्न भएको पाइएको र सोही प्रतिवेदनका आधारमा उनलाई आज पक्राउ गरिएको कास्की प्रहरीले जनाएको छ ।

उनले धनुष सहकारीको ऋण उपसमितिमा बसेर कृत्रिम खातामार्फत ८२ लाख हिनामिना गरेको प्रतिवेदनमा औँल्याइएको छ। अन्य ४ जनाको नाममा पक्राउ पुर्जी जारी भएको छ।

उक्त सहकारीबाट ११ करोड बढी हिनामिना भएको पाइएको छ । उनीलगायतको जाहेरीका आधारमा ग्यालेक्सी टेलिभिजनका पूर्वप्रबन्ध निर्देशक रवि, सञ्चालक जीबी राईलगायत विरूद्ध एक अर्ब ५१ करोड हिनामिना गरेको आरोपमा मुद्दा दर्ता भएको हो । उक्त मुद्दा अहिले विचाराधीन रहेको छ ।

क्याटेगोरी : जनगुनासो, प्रमुख समाचार, राजनीति, विचार/लेख, समाचार