रुपन्देहीको सुप्रिम सहकारी हिनामिना अनुसन्धानः रवि लामिछानेसँग साढे १२ घण्टा बयान

खोज पत्रिका बिहिबार, २०८१ कार्तिक २९, ०३ :१२ बजे

काठमाडौं । राष्ट्रिय स्वतन्त्र पार्टीका सभापति रवि लामिछानेको रुपन्देहीमा साढे १२ घण्टा बयान लिइएको छ । बुधबार दोस्रो दिन ९ घण्टा बयान लिएपनि सकिएको छैन । मंगलबार भैरहवा लगिएका उनीसँग बुधबार विहान सवा १० बजेदेखि सांझ सवा ७ बजेसम्म बयान लिइएको हो ।

जिल्ला सरकारी वकिल कार्यालय रुपन्देहीका जिल्ला न्यायाधिवक्ता प्रेमराज पौडेल, इलाका प्रहरी कार्यालय बुटवलका डीएसपी विजयराज पण्डित, जिल्ला प्रहरी कार्यालयका अनुसन्धान अधिकारीहरु लगायतको उपस्थितिमा लामिछानेको बयान लिइएको हो । करिब ९ घण्टा बयान लिइएको र अझै नसकिएको जिल्ला सरकारी वकिलको कार्यालय रुपन्देहीले जनाएको छ ।

बिहीबार १० बजेदेखि पुनः बाँकी बयान लिने बताइएको छ । लामिछाने प्रबन्ध निर्देशक रहेका बेला रुपन्देहीको सुप्रिम सहकारीको रकम गोर्खा मिडिया नेटवर्क प्रालिमा लगिएको विषयमा प्रहरीले अनुसन्धान गरिरहेको हो । यो सहकारीबाट २ करोड रुपैयाँ रवि लामिछानेकै नाममा पनि निकास भएको भेटिएको थियो ।

मंगलबार बयान सकिएपछि बाहिरिने क्रममा लामिछानेले खोरमा थुन्दैमा बाघ स्याल हुँदैन भन्दै प्रतिक्रिया दिएका थिए । लामिछानेलाई सरकारी वकिलको कार्यालय लैजाने र ल्याउने क्रममा पत्रकारले फोटो समेत लिन नपाउने गरी बुधबार प्रहरीले कडा सुरक्षा घेरा बनाएको थियो । सरकारी वकिलको कार्यालयमा ठूलो संख्यामा प्रहरी अधिकृतहरु नै खटिएर प्रहरीको घेरामा नै बयान कक्षसम्म पुर्‍याइएको थियो ।