करोडौ लिएर भागेका प्रभु बैंकका कर्मचारी अझै भेटिएनन्, निरजबिक्रम शाह बिरुद्ध बैङ्किङ कसुर मुद्धा दर्ता

खोज पत्रिका बिहिबार, २०८० फाल्गुन ३, ०९ :०५ बजे

रुकुमपश्चिम । जिल्लाको आठविसकोट नगरपालिकामा रहेको प्रभु बैंकका अप्रेशन ईन्चार्ज निरज बिक्रम शाह अझै भेटिएका छैनन् । एक करोड ३१ लाख २५ हजार रुपियाँ लिएर फरार भएका शाह कहाँ छन् कुनै टुंगो लागेको छैन् । तर, एक करोड ३१ लाख २५ हजार रकम अपचलन गरेको आरोपमा उनीबिरुद्ध मुद्धा दर्ता भएको हो ।

बैंकको अप्रेशन ईन्चार्ज पदमा कार्यरत निरजबिक्रम शाहले एक करोड ३१ लाख २५ हजार रुपियाँ अपचलन गरेको भन्दै जिल्ला प्रहरी कार्यालयमा मुद्धा दर्ता भएको हो । शाह बिरुद्ध प्रभु बैंकको कर्णाली प्रदेश कार्यालयले बैङ्किङ कसुर शिर्षकमा मुद्धा दिएको जिल्ला प्रहरी कार्यालयका प्रहरी नायब उपरिक्षक नमराज भट्टराईले जानकारी दिए ।

अपरेशन ईन्चार्ज शाहले बैंकका खातावालाहरुको रकम अनाधिकृत रुपमा निकाल्ने, जम्मा गर्ने, अरुलाई ट्रान्सफर गर्ने गरेको आरोप लागेको छ । शाहले पदको दुरुपयोग गरेर करोडौ रुपियाँ हिनामिना गरेको गुनासोपछि बैंकले आन्तरिक छानबिन समेत सुरु गरेको थियो । झुठ्ठा विवरण र खातावालाको जानकारी बिनै बैंकमा जम्मा गरेको रकम अपचलन गरेको पाईएपछि उक्त रहस्य खुलेको हो ।

बैंकको कर्णाली प्रादेशिक कार्यालय सुर्खेतका प्रमुख शरदराज तिमिल्सिनाको नेतृत्वमा आएको टोलीले यस घटनाको प्रारम्भिक छानबिन गरेर आरोपी कर्मचारी बिरुद्ध मुद्धा दर्ता गरेको हो । इन्चार्ज शाहले एक करोड ३१ लाख २५ हजार रुपियाँ अपचलन गरेको देखिएको छ । रकम अपचलन गरेको आरोप लागेका कर्मचारी शाह भने फरार छन् ।

शाखामा कार्यरत कर्मचारीहरुलाई जिम्मेवारविहिन बनाएर नयाँ कर्मचारीको टोलीले शाखाको दैनिक काम गरिरहेको छ । आठविसकोट नगरपालिका –१२ का डण्डे कुसारीले बैंकमै गएर दिएको १७ लाख रुपियाँ शाहले गायब पारेको गुनासो गरे । आठविसकोट नगरपालिका –११ की मनकला पुनले चेक सकिएपछि निकाल्न गएको बेला ईन्चार्ज शाहले म ल्याईदिउला भनेर चेक छोडेको तर उनले जानकारी नदिई आफ्नो चेकबाट रकम निकाल्ने गरेको बताइन । छ लाख रुपियाँ शाहले निकालेर हिनामिना गरेको उनको गुनासो छ ।