प्रधानमन्त्री प्रचण्ड स्वयंले काम गर्ने तरिका बदल्नुपर्छः गगन थापा

खोज पत्रिका बुधबार, २०८० माघ २४, १६ :१० बजे

काठमाडौं । सत्तारुढ प्रमुख घटक नेपाली काँग्रेसका महामन्त्री गगनकुमार थापाले प्रधानमन्त्री पुष्पकमल दाहाल प्रचण्ड आफैले काम गर्ने तरिका बदल्नुपर्ने बताएका छन् ।

निर्देशन मात्रै दिने तर आफू स्वयंले भने काम गर्ने तरिका नबदल्ने हो भने फरक परिणामको अपेक्षा गर्नेकुरा मुर्खता शिवाय अरु केही नहुने महामन्त्री थापाको भनाई थियो ।

बुधवार प्रतिनिधि सभा बैठकमा उनले प्रधानमन्त्री प्रचण्डले पछिल्लो समयमा दिँदै आएको निर्देशनप्रति संकेत गदै त्यसले मुलुकमा कुनै पनि समस्याको समाधान नहुने जिकिर गरे । उनले प्रधानमन्त्री प्रचण्डले कार्यालय प्रमुख झैं देशको प्रमुखको रुपमा काम गरेर मात्रै मुलुकको समस्या पहिचान हुने र त्यसले समाधान पनि पाउने दाबी गरे ।

महामन्त्री थापाले तीन वटै तहको सरकारले निर्देशन दिने मात्रै काम गरेकाले जनताको अपेक्षाअनुसार काम हुन नसकेको पनि बताए । उनले मुलुकको समस्या समाधानका लागि प्रधानमन्त्री प्रचण्डले अतिरिक्त पहलकदमी लिनुपर्ने बताएका थिए ।