Techie IT
  • ५ असार २०८१, मंगलबार
KhojPatrika

निष्पक्ष भूमिका ननिभाएको राष्ट्रपति पौडेललाई एमाले अध्यक्ष ओलीको आरोप


काठमाडौं । प्रमुख प्रतिपक्ष दल नेकपा एमालेका अध्यक्ष केपी शर्मा ओलीले राष्ट्रपति रामचन्द्र पौडेलले काँग्रेसको प्रतिनिधिको रुपमा काम गरिरहेको गम्भिर आरोप लगाएका छन् । संविधान अनुसार राष्ट्रपति पौडेल र प्रधानमन्त्री पुष्पकमल दाहाल प्रचण्ड दुवै नचलेको ओलीको भनाई छ । सरकारको काम कारवाहीमा चर्को आलोचना गरेका ओलीले विकासभन्दा गुन्डाहरूको संरक्षणमा आफ्नो रुचि देखाएको आरोप लगाएका छन् ।

नेकपा एमालेका अध्यक्ष केपी शर्मा ओलीले राष्ट्रपति रामचन्द्र पौडेल निष्पक्ष हुन नसकेको आरोप लगाएका छन् । पार्टीको जनसंगठन समन्वय संयन्त्रले शनिबार आयोजना गरेको कार्यक्रममा अध्यक्ष ओलीले अहिले पनि राष्ट्रपतिले कांग्रेसको प्रतिनिधि भएर काम गरिरहेको आरोप लगाए । राष्ट्रपतिले तनहुँमा पुगेर काँग्रेसमा भोट हालेकोमा धन्यवाद दिएको र भूकम्प प्रभावित क्षेत्र जाजरकोटमा पनि काँग्रेसको प्रतिनिधिको रुपमा पुगेको ओलीको आरोप छ ।

राष्ट्रपति पौडेलको शुरुदेखि नै पदीय निष्पक्षतामाथि प्रश्न उठेको दाबी गर्दै अलोकतान्त्रिक, पक्षपातपूर्ण र संविधान सिध्याउने काममा लागि परेको ओलीको आरोप छ । ओलीले संविधानअनुसार राष्ट्रपति पौडेल र प्रधानमन्त्री प्रचण्ड दुवै नचलेको जिकिर गरे । उनले वर्तमान सरकारलाई विकाशतर्फ नभएर गुण्डाहरूको प्रोत्साहन र अपराधीहरूलाई छुटकारा दिनतर्फ केन्द्रित भएको बताए । सबै तहका अदालतले सर्वस्वसहित जन्मकैदको फैसला गर्दा पनि सरकारले थुन्नै नहुने भन्दै त्यस्ता व्यक्तिलाई आममाफी दिने गरेको ओलीको भनाई छ ।

त्यस्तै, महासचिव शंकर पोखरेलले नेपाललाई विदेशीहरुको क्रिडास्थल बनाउन एमाले र नेपाली सेनामाथि प्रहार भइरहेको बताए । उनले नेपाली सेना र नेकपा एमाले कमजोर बनाउन सके नेपाल राष्ट्रलाई विदेशीहरुको क्रिडास्थल बनाउन सकिने मनशायले नेकपा एमालेमाथि प्रहार भइरहेको उनको भनाई छ । महासचिव पोखरेलले जाजरकोट र रुकूम पश्चिमको भुकम्पको विषयलाई लिएर जनतालाई राहत र उद्धारको आवश्यकता भएको अवस्थामा सरकार मैदानबाट भागेको आरोप लगाएका थिए ।


क्याटेगोरी : जनगुनासो, देश/दुनियाँ, प्रमुख समाचार, राजनीति, विचार/लेख, समाचार, सामाजिक सञ्जाल
ट्याग : #केपी शर्मा ओली, #प्रधानमन्त्री पुष्पकमल दाहाल प्रचण्ड, #राष्ट्रपति पौडेल

तपाईको कमेन्ट लेख्नुहोस्