सुनिल शर्मालाई थुना बाहिरै राखेर अनुसन्धान गर्न अदालतको आदेश !

खोज पत्रिका शुक्रबार, २०८० साउन २६, २० :०७ बजे

काठमाडौं । नेपाली कांग्रेसका सांसद सुनिल शर्मालाई थुनामा राख्न नपर्ने जिल्ला अदालतको काठमाडौंको आदेशपछि शर्मा रिहा भएका छन् । काठमाडौं जिल्ला अदालतले थुनाका लागि म्याद लिन पुगेको सरकारी वकिल कार्यालयलाई शर्मालाई थुनामा राख्न नपर्ने आदेश गरेको हो ।

जिल्ला न्यायाधीश दण्डपाणी शर्माले सांसद शर्मालाई थुनाबाहिरै राखेर अनुसन्धान गर्न आदेश दिएका हुन् । अदालतको आदेशपछि प्रहरी हिरासतममा रहेका शर्मा रिहा भएका छन् । नक्कली शैक्षिक प्रमाणपत्र प्रकरणमा प्रहरीको केन्द्रीय अनुसन्धान व्यूरोले शर्मालाई बिहीबार पक्राउ गरेको थियो ।

नक्कली प्रमाणपत्र प्रकरणमा पक्राउ परेका शर्माबाहेक अन्य पाँच जना चिकित्सकलाई भने ५ दिन हिरासतमा राख्न अदालतले अनुमति दिएको छ । यसअघि गृहमन्त्री नारायणकाजी श्रेष्ठले प्रतिसोध साँध्न सांसद शर्मालाई पक्राउ गरेको भन्दै कांग्रेस संसदीय दलको बैठकमा चर्को आलोचना भएको थियो ।

सांसदहरु आरजु राणा देउवा, डाक्टर चन्द्र भण्डारी र श्याम घिमिरेले सांसद शर्मालाई पक्राउ गर्नु गलत रहेको बताएका थिए । कांग्रेसबाहेक एमाले सांसद ज्वालाकुमारी शाहले समेत शर्मालाई पक्राउ गर्नु गलत रहेको संसद बैठकमा बताएकी थिइन् । एकसयकिलो सुन तस्करी प्रकरणमा गृहमन्त्री र अर्थमन्त्रीले राजीनामा दिनुपर्ने माग गर्दै आएका शर्मा पक्राउ परेपछि एमालेले समेत पक्राउको विरोध गरेको हो ।