थाइल्याण्डमा नयाँ प्रधानमन्त्री चयन गर्न असफल

खोज पत्रिका बिहिबार, २०८० असार २८, २० :४७ बजे

काठमाडौं । थाइल्याण्डको संसद बिहीबार नयाँ प्रधानमन्त्री चयन गर्न असफल भएको छ ।

प्रधानमन्त्रीका एक मात्र उम्मेदवार तथा मुभ फरवार्ड पार्टीका नेता पिता लिम्जारोएनरातले सांसदहरूबाट बहुमत प्राप्त गर्न नसकेपछि प्रधानमन्त्री चयन हुन नसकेको हो ।

पाँच सय सदस्यीय तल्लो सदन र २५० सिनेटरको माथिल्लो सदनको संयुक्त अधिवेशनमा पिता प्रधानमन्त्रीका लागि मनोनीत एकमात्र उम्मेदवार थिए । तर, उनको पक्षमा ३२४ मतमात्र परेको थियो । यो प्रधानमन्त्री बन्न आवश्यक ३७६ मतको साधारण बहुमतभन्दा कम थियो ।

सांसदहरूबीच घन्टौं लामो बहसपछि मतदान भएको थियो । थाइल्याण्डमा गत मे महिनामा भएको आमनिर्वाचनमा मुभ फरवार्ड पार्टी संसदको तल्लो सदनमा सबैभन्दा ठूलो दलको रूपमा उदाएको थियो ।