प्रहरीले लिन मानेन रवि लामिछानेविरुद्धको उजुरी

खोज पत्रिका मङ्लबार, २०७९ माघ १७, २२ :३४ बजे

काठमाडौं । प्रहरीले राष्ट्रिय स्वतन्त्र पार्टी सभापति रवि लामिछानेविरुद्ध जाहेरी लिन अस्वीकार गरेको छ । खारेज भएको नागरिकताका आधारमा राहदानी लिएको भन्दै राहदानी ऐनअनुसार कारबाही गर्न माग गर्दै युवराज पौडेल जाहेरी लिएर काठमाडौं प्रहरी परिसर पुगेपनि उनको जाहेरी दर्ता गर्न प्रहरीले अस्वीकार गरेको हो ।

नागरिकतासम्बन्धी विवादमा सर्वोच्च अदालतले गरेको फैसलाको पूर्णपाठ नआइसकेकाले जाहेरी दर्ता नगरिएको प्रहरीले जनाएको छ । लामिछानेले अमेरिकी नागरिक रहेका बेला नेपालको पुरानो नागरिकतालाई प्रयोग गरेर २०७२ जेठ १२ गते नेपाली पासपोर्ट लिएका थिए । सर्वोच्च अदालतको शुक्रबारको फैसलाअनुसार उनको त्यो नागरिकता २०७० मै खारेज भइसकेको थियो ।

सोही कारण सर्वोच्चले उनको सांसद पद समेत खारेज गर्ने फैसला सुनाएको छ भने लामिछानेले पनि नयाँ नागरिकता लिइसकेका छन् । जाहेरीमा लामिछानेले झुटो विवरण दिई राहदानी लिएकाले तत्काल नियन्त्रणमा लिन र आवश्यक अनुसन्धान गरी कानुन बमोजिम मुद्दा चलाउन माग गरिएको थियो ।