विमानस्थलमा आवात–जावतमा पास बनाइदिए बाफत घुस, आन्तरिक टर्मिनल प्रमुख चुडाल पक्राउ

खोज पत्रिका मङ्लबार, २०७९ माघ १०, १३ :२५ बजे

काठमाडौं । त्रिभुवन अन्तर्राष्ट्रिय विमानस्थलको आन्तरिक टर्मिनल प्रमुख पूर्ण चुडाल पक्राउ परेका छन् । अख्तियार दुरुपयोग अनुसन्धान आयोगले घुस लिएको आरोपमा चुडाललाई पक्राउ गरेको हो ।

चुडालले विमानस्थलको आन्तरिक टर्मिनलसम्म आवत–जावत गर्न पास बनाइदिने भन्दै प्रतिमहिना १० हजार लिने गरेको अख्तियारले जनाएको छ । २०७८ कात्तिकदेखि हालसम्म १ बर्ष ५ महिनाको एक मुष्ठ १ लाख ५० हजार घुस लिइसकेका अवस्थामा उनलाई कार्यकक्षबाटै पक्राउ गरेको अख्तियारले जनाएको छ ।

अख्तियारले घुस दिने रकमको नोटका नम्बरहरु पहिल्यै नोट गरेको थियो । तर, आयोगका कर्मचारीहरु पुग्दा उनको साथमा त्यो रकम भने भेटिएको छैन । कार्यकक्षमा रहेको दराजमा स्रोत नखुलेको ८ लाख रुपैयाँ भेटिएको अख्तियारले जनाएको छ । चुडालले त्यो रकमको स्रोत खुलाएका छैनन् ।

घुसवापत लिएको रकम उनले कहाँ राखे भन्ने विषयमा पनि खोजी भइरहेको अख्तियारले जनाएको छ । चुडाल नागरिक उड्डयन कार्यालय, चन्द्रगढी झापाबाट सरुवा भएर काठमाडौं आएका हुन ।

क्याटेगोरी : जनगुनासो, देश/दुनियाँ, प्रमुख समाचार, राजनीति, समाचार
ट्याग : #त्रिभुवन अन्तर्राष्ट्रिय विमानस्थल