Techie IT
  • १२ वैशाख २०८१, बुधबार
KhojPatrika

तीन जिल्लामा अझै खुलेनन् मतपेटिका,जाँचबुझ गर्न आयोगले पठायो टोली


काठमाडौं । मंसिर ४ गते भएको प्रतिनिधिसभा र प्रदेशसभा निर्वाचनको मतगणनाको काम अन्य क्षेत्रमा अन्त्यतिर पुग्न लाग्दा पनि ३ जिल्लामा अझै मतपेटिका खोलिएको छैन । बाजुरा, दोलखा र स्याङजामा राजनीतिक दलहरुबीचको विवादका कारण मतगणना हुन हुनै सकेको छैन । बाजुराको बुढीनन्दा ५ लगायत जिल्लाका दुई दर्जन मतदान केन्द्रमा विवाद र झडप भएको थियो ।

ती जिल्लामा भएको एक मतदान केन्द्रको झडपमा परी कांग्रेस निकट विद्यार्थी संगठन नेविसंघका कार्यकर्ता सञ्जिव ऐडी र एमालेको विद्यार्थी संगठनका नेता चेतन ऐडीको मृत्यु भएको थियो । बुढीनन्दामा शनिबार पुनः मतदान गराउन निर्वाचन आयोगले निर्देशन दिएपनि एमालेको अवरोधका कारण जिल्ला निर्वाचन अधिकृतको कार्यालयले शनिबार निर्वाचन गराउन सक्ने अवस्था देखिदैन ।

त्यस्तै, दोलखामा एमालेले मतगणना कार्यमा सहभागी नहुने भन्दै पुनः मतदानको माग गरिरहेको छ । जिल्लाका विभिन्न ६ मतदान केन्द्रमा बुथ कब्जा भएको एमालेको आरोप छ । कालिन्चोक गाउँपालिका वडा नम्बर १ को मतदान केन्द्रमा ९० प्रतिशत मतदान भएको, बैतेश्वर गाउँपालिका वडा नम्बर १ को कालीढुङ्गा मतदान केन्द्रमा ९० प्रतिशतमाथि मत खसेको, बैतेश्वर ६ को मतदान केन्द्रमा मतपेटिका चोरिएको, मतपेटिकामा पानी परेको र मतपत्र छरिएको आरोप एमालेले लगाएको छ । दोलखाको तामाकोशी गाउँपालिका, मेलुङ गाउँपालिका, कालिन्चोक गाउँपालिका, शैलुङ गाउँपालिकामा धाँधली भएको आरोप उसले लगाएको छ ।

यस्तै स्याङजामा पनि बुथ कब्जा भएको भन्दै एमालेले मतगणना अघि बढाउन दिएको छैन । जिल्लाका विभिन्न ४ मतदान केन्द्र कब्जा गरेर मत हालेकोले ती बुथमा फेरि निर्वाचन गर्न एमालेको माग छ । तर, निर्वाचन अधिकृतको कार्यालयले कुनै धाधली नभएको भन्दै निर्वाचन आयोगमा पत्र लेखेर पठाएको छ ।

मतगणना हुन नसकेका ३ जिल्लामा निर्वाचन आयोगले छानबिन टोली पठाएको छ । आयोगले सहसचिव तहको कर्मचारीको नेतृत्वमा छानबिन टोली पठाएको आयोगका प्रवक्ता शालिग्राम शर्मा पौड्यालले जानकारी दिए । देशका १६५ निर्वाचन क्षेत्रमध्ये १ सय ६२ निर्वाचन क्षेत्रमा मतगणना सकिन लागेको बाजुरा, दोलखा र स्याङजामा मतगणना सुरु हुन नसकेको हो ।


क्याटेगोरी : देश/दुनियाँ, प्रमुख समाचार, राजनीति, विचार/लेख, समाचार, सामाजिक सञ्जाल
ट्याग : #दोलखा र स्याङजा, #बाजुरा, #मतगणनाको काम, #मतपेटिका

तपाईको कमेन्ट लेख्नुहोस्