कान्तिपुर सेभिङ एण्ड क्रेडिट सहकारीले पैसा फिर्ता नदिएपछि बचतकर्ता आन्दोलनमा

खोज पत्रिका आइतवार, २०७९ भदौ ५, १८ :०७ बजे

काठमाडौं । दैनिक एकपछि अर्को सहकारीमा समस्या उत्पन्न हुँदै आएको छ । गौतम सहकारीको घटना सेलाउन नपाउदै फेरि शान्तिनगरको कान्तिपुर सेभिङ एण्ड क्रेडिट को–अपरेटिभ लिमिटेडका बचतकर्ताहरू आन्दोलनमा उत्रिएका छन् ।

२५ वर्षदेखि सञ्चालनमा रहेको उक्त सहकारीले आफूहरूको बचत रकम फिर्ता नदिएको भन्दै आन्दोलन थालेका हुन् । सहकारीले भने सबै बचतकर्ता एकै पटक पैसा लिन आएपछि समस्या परेको बताएको छ । फिक्स डिपोजिटमा राखेको बचतको समय अवधि पूरा हुँदासम्म पैसा निकाल्न नदिएको गुनासो बचतकर्ताहरूको छ ।

फिक्स डिपोजिटमा राखेको २० लाखको समयसीमा एक साताअघि नै सकिएकोमा आधा मात्रै पैसा दिएर बाँकी पैसा पुनः डिपोजिट गराएर सहकारीले नवीकरण गराएको पीडितमध्येकी एक रमा दाहालले जानकारी दिइन । कान्तिपुर सेभिङ एण्ड क्रेडिट को–अपरेटिभ लिमिटेड सहकारीमा २० हजार सदस्य रहेका छन् ।