नेपाल आयल निगमले फेरि बढायो पेट्रोलियम पदार्थको मूल्य

खोज पत्रिका मङ्लबार, २०७९ असार २१, ०३ :०३ बजे

काठमाडौं । नेपाल आयल निगमले पेट्रोल, डिजेल, मट्टितेल र आन्तरिकतर्फको हवाइ इन्धनको फेरि मूल्यवृद्धि गरेको छ ।

सोमबार साँझ आयल निगमले एक विज्ञप्ति जारी गरी पेट्रोलमा प्रतिलिटर २ रुपैयाँ, डिजेल र मट्टितेलमा प्रतिलिटर ९ रुपैयाँ र आन्तरिकतर्फको हवाइ इन्धनमा प्रतिलिटर ५ रुपैयाँ मूल्यवृद्धि गरेको हो ।

सोमबार राति १२ बजेदेखि पेट्रोलको मूल्य प्रतिलिटर १ सय ८१, डिजेल र मट्टितेलको मूल्य प्रतिलिटर १ सय ७२ र आन्तरिकतर्फको हवाइ इन्धनको मूल्य प्रतिलिटर १ सय ९० पुगेको छ ।

नेपाल आयल निगमले इन्धन आपूर्ति नै प्रभावित हुन सक्ने भन्दै प्रधानमन्त्री र उद्योगमन्त्रीलाई चेतावनीसहितको पत्राचार गरेको थियो । घाटा थेग्नै नसक्ने भएपछि नेपाल आयल निगमले प्रधानमन्त्री तथा उद्योग वाणिज्य तथा आपूर्ति मन्त्रीको ध्यानाकर्षण गराएको थियो ।

निगमले सोमवार दुवै निकायमा पत्राचार गर्दै इन्धन आपूर्ति नै प्रभावित हुन सक्ने चेतावनी दिएको थियो । पत्रमा भनिएको छ,‘विषम परिस्थितिमा निगमलाई कुनै स्रोतबाट आवश्यक रकम उपलब्ध हुन सकेन, मूल्य समायोजन पनि हुन नसकेको हुँदा निकट भविष्यमा नै पेट्रोलियम पदार्थको आपूर्तिमा समस्या हुनसक्छ ।’

क्याटेगोरी : अर्थ, प्रमुख समाचार, राजनीति, समाचार
ट्याग : #नेपाल आयल निगम, #फेरि मूल्यवृद्धि