एमसीसीका बिपक्षमा उभिने दलले सरकार छोड्न बाबुरामको चेतावनी,भेडा बाख्राको संज्ञा

खोज पत्रिका बुधबार, २०७८ फाल्गुन ४, ०८ :५० बजे

काठमाडौं । जसपाका संघीय परिषद् अध्यक्ष तथा पूर्वप्रधानमन्त्री डाक्टर बाबुराम भट्टराईले एमसीसीको विरोध गर्नेहरु गठबन्धनकै समर्थकसँग मिलेर सरकारमा बस्न नमिल्ने बताएका छन् । एमसीसीको समर्थक र विरोधी एकै गठबन्धनमा बस्नै नमिल्ने उनको भनाई छ ।

एमसीसीको मुद्दालाई एउटा विकास अनुदानको विषय मात्र नबनाएर देशको परराष्ट्र नीति,राज्यप्रणाली र विकास नीतिको विषय बनाउने हो भने यसका समर्थक र विरोधीहरू एउटै गठबन्धन–सरकारमा बस्न मिल्दैन’, भट्टराईले ट्वीटरमा भनेका छन्, ‘सत्ताको तर पनि मार्ने र बाहिर साखुल्ले हुने छुट हुनुहुदैन।’ उनले यस्तो हुने हो भने ‘भेडा भेडासँग बाख्रा बाख्रासँग हुनु राम्रो’ हुन्छ भनि टिप्पणी गरेका छन् । भट्टराईले एमसिसीको विरोध गर्नेहरुलाई सरकार र गठबन्धनबाट बाहिरिन सुझाइदिएका छन्।

एमसिसीको पक्षमा लगातार बोल्दै आएका पूर्वप्रधानमन्त्री समेत रहेका भट्टराईले सत्ता गठबन्धनभित्रै एकमत हुन नसकेका बेला यस्तो अभिव्यक्ति दिएका हुन्। सत्तारुढ घटकले नै एमसिसीको मुद्दालाई विकास अनुदानको विषय मात्र नबनाएर देशको परराष्ट्र नीति, राज्य प्रणाली र विकास नीतिको विषय बनाउन खोजेको भट्टराईको आरोप छ।