सत्ता गठबन्धनमै एमसीसीबारे फरक–फरक मत, देउवाले पाएनन् पास गर्ने साथ

काठमाडौं । सत्तारुढ ५ दलीय गठबन्धनले अमेरिकी सहयोग मिलेनियम च्यालेन्ज कर्पोसेशन (एमसीसी) बारे टुंगोमा पुग्न ३ सदस्यीय कार्यदल गठन गरेको छ । कार्यदलमा नेकपा एकीकृत समाजवादीका नेता झलनाथ खनाल, नेपाली काँग्रेसका नेता तथा सञ्चारमन्त्री ज्ञानेन्द्र बहादुर कार्की र माओवादी केन्द्रका नेता नारायणकाजी श्रेष्ठ छन् । आइतबार प्रधानमन्त्री निवास बालुवाटारमा सर्वदलीय बैठक बस्नुअघि सत्तारुढ ५ दलीय गठबन्धनको बैठक बसेको थियो । सो बैठकले एमसीसीका सम्बन्धमा टुंगोमा पुग्न तीन नेतालाई जिम्मेवारी दिएको हो । कार्यदलले एमालेलगायत अन्य दलहरुसँग छलफल गरेर एमसीसीबारे ठोस निष्कर्षमा पुग्ने बताइएको छ ।

तीन सदस्यीय कार्यदलको नेतृत्व गरेका खनाल यसअघि नेकपाद्वारा गठित एमसीसी सम्बन्धी कार्यदलका समेत संयोजक थिए । खनालले एमसीसी यथास्थितिमा पारित हुन नसक्ने बताउँदै आएका छन् । त्यसैगरी कार्यदलमा रहेका माओवादी नेता श्रेष्ठ पनि एमसीसी यही अवस्थामा पारित हुन नहुने लाइनमा छन् । कार्यदलका सदस्य रहेका मन्त्री कार्की भने यसअघि एमसीसी सम्झौताका हस्ताक्षरकर्ता समेत हुन् ।

तीन सदस्यीय कार्यदल गठनलगत्तै आइतबार बालुवाटारमा सर्वदलीय बैठक बसेको थियो । सो बैठकमा काँग्रेसबाहेक सबै दलका नेताले एमसीसी यथास्थितिमा पारित हुन नसक्ने अडान राखेका थिए । सर्वदलीय बैठकमा डाकिएपनि प्रमुख प्रतिपक्षी एमाले भने अनुपस्थित रहेको थियो । गठबन्धनको बैठकले एमालेसँग समेत छलफल गर्ने जिम्मेवारी कार्यदललाई दिएको छ ।
सत्ता गठबन्धनमै एमसीसीमा सहमति जुट्न कठिन
फरक फरक विचारधारा बोकेका पाँच राजनीतिक दलको सत्ता गठबन्धनमा अमेरिकी सहयोग मिलेनियम च्यालेञ्ज कर्पाेरेसन, एमसीसी सम्झौताको विषयलाई लिएर एकै धारणा बन्न सकेको छैन । प्रधानमन्त्री शेरबहादुर देउवा संसदको यही अधिवेशनमा एमसीसी सम्झौता पारित गराउन चाहन्छन् । तर, सत्तारुढ दलहरुभित्रै एकमत नहुँदा उनी अलमलमा परेका छन् । त्यही कारण प्रधानमन्त्री देउवाले सम्झौतालाई अगाडि बढाउन छलफललाई समेत तिव्रता दिएका छन् । अमेरिकी सहयोग मिलेनियम च्यालेञ्ज कर्पाेरेसन, एमसीसी सम्झौताले यतिबेला देशको राजनीति तातेको छ । प्रधानमन्त्री शेरबहादुर देउवाले संसदको यही हिउँदै अधिवेशनमा एमसीसीलाई अघि बढाउने गृहकार्य थालेसँगै सत्तामा रहेका दलहरुले नै फरक फरक धारणा सार्वजनिक गर्न थालेका छन् ।

नेकपा माओवादी केन्द्र एमसीसी सम्झौतालाई परिमार्जनसहित पारित गर्नुपर्ने पक्षमा छ । सत्ता गठबन्धनको प्रमुख साझेदार दल नेकपा माओवादी केन्द्रले पुसको दोस्रो साता हुने राष्ट्रिय सम्मेलनपछि मात्रै यस विषयमा स्पष्ट धारणा बनाउने भित्रि तयारी गरिरहेको छ । अर्काे सत्ता साभेदार दल नेकपा एकीकृत समाजवादी भने एसमसीसी सम्झौता संसदबाट पारित पास गर्नै नहुने अडानमा छ । जनता समाजवादी एमसीसी पारित गराउने पक्षमा छ । उता राष्ट्रिय जनमोर्चाले एमसीसी राष्ट्रघाती सम्झौता भएकाले कुनैपनि हालतमा संसदबाट पारित गर्न नहुने धारणा बनाएको छ । यद्यपि उनले यो सम्झौता संसदबाट नभइ अर्थ मन्त्रालयले नै कार्यान्वयनमा लैजान सक्ने बताइन् । साथै उनले संसदबाट पारित गराउने खेलले यो सम्झौताबाट भविष्यमा अमेरिकाले गलत फाइदा लिनसक्ने दाबी पनि गरिन् ।

गठबन्धन दलबाट फरक धारणा सार्वजनिक हुन थालेसँगै प्रधानमन्त्री देउवाले आइतबार सत्ता गठबन्धनका दलहरुसँग छलफल गरेका छन् । त्यसैगरी संसदमा प्रतिनिधित्व गर्ने सबै राजनीतिक दलको सहमति खोज्न पनि देउवाले सर्वदलीय बैठक बोलाए । तर प्रमुख प्रतिपक्षी दल नेकपा एमालेले भने बैठक नै बहिस्कार ग¥यो । जसका कारण उमसीसीमा राष्ट्रिय सहमति बनाउने प्रधानमन्त्रीको योजना समेत असफल बनेको छ । सत्तारुढ नेपाली काँग्रेसले भने प्रमुख प्रतिपक्षसहित सबै दललाई सहमतिमा ल्याएर संसदबाट एमसीसी सम्झौतालाई पारित गर्ने गृहकार्य भइरहेको जनाएको छ ।

नेपालको विकासको पक्षमा यो सम्झौता रहेको दाबी गर्दै काँग्रेसले राष्ट्रिय सहमति बनाउनुपर्नेमा जोड दिएको हो । एमसीसी सम्झौता लगायत संसद सुचारु गराउन प्रमुख प्रतिपक्षी दल नेकपा एमालेलाई मनाउन प्रधानमन्त्री देउवा यतिबेला दौडधुपमा छन् । तर एमाले भने आफ्नो पूर्ववत अडानबाट टसको मस भएको छैन । भित्रिरुपमा भने एमाले अध्यक्ष केपी शर्मा ओलीले एमसीसी सम्झौतालाई अगाडि बढाउन साथ दिने वचन प्रधानमन्त्री देउवालाई दिएको बुझिएको छ । ओलीको समर्थनमा एमसीसी सम्झौता संसदबाट पारित भएको खण्डमा सत्तारुढ गठबन्धन मै संकट आउने परिस्थितिका कारण सरकारले तत्काल एमसीसी सम्झौता संसदमा पेश गर्ने सम्भावना न्युन देखिन्छ ।

थप समाचार

अमेरिकी राष्ट्रपतिका उमेद्वार ट्रम्प–ह्यारिस पहिलो पटक आमनेसामने

प्रधानमन्त्री ओलीलाई बालेनले भने–उहिल्यै मरिन् सासू, अहिले आए आँसु

रवि लामिछानेले भेटे प्रधानमन्त्री ओली,पोखरामा कालोझण्डा देखाएकोमा असन्तुष्टि

उपसभामुख रानालाई किन हटाउन खोज्दैछन् सत्तारुढ दल, यस्तो छ लागेको…

प्रतिनिधिसभा बैठक बस्दै, यस्तो छ कार्यसूची

५ जिल्लाका सीडीओ फेरिए, काठमाडौँमा जयनारायण आचार्य