लुम्बिनी प्रदेशमा बिपक्षी गठबन्धन सरकार बनाउन दौडधुपमा, २२ घन्टाभित्र सरकार गठन गर्न आह्वान

खोज पत्रिका बुधबार, २०७८ साउन २७, १८ :३५ बजे

काठमाडौं । मुख्यमन्त्री शंकर पोखरेलले पदबाट राजीनामा गरेपछि लुम्बिनी प्रदेश प्रमुख अमिक शेरचनले २२ घन्टाको समय दिएर नयाँ सरकार गठनका लागि आह्वान गरेका छन् । प्रदेश प्रमुख शेरचनले बुधबार ५ बजे सूचना जारी गर्दै बिहीबार ३ बजेभित्र सरकार गठनका लागि दललाई आह्वान गरेका हुन् ।

संविधानको धारा १६९ को उपधारा १ को खण्ड ‘क’ बमोजिम मुख्यमन्त्री पोखरेलले साउन २७ गते राजीनामा दिएकाले प्रदेश प्रमुखले संविधानको धारा १६८ को उपधारा २ बमोजिम बहुमतको सरकार गठन गर्न आह्वान गरेका हुन् । यससँगै विपक्षी गठबन्धनले नयाँ सरकार गठनको पहल थालेका छन् ।

मुख्यमन्त्रीविरूद्धको अविश्वास प्रस्तावमा नेपाली कांग्रेसका १६, माओवादी केन्द्रका १४, जसपाका तीन र राष्ट्रिय जनमोर्चाका एक प्रदेशसभा सदस्यले हस्ताक्षर गरेका थिए । पोखरेलको पक्षमा नेकपा एमालेका ३९ प्रदेशसभा सदस्य छन् । माओवादी केन्द्रका नेता कुलबहादुर केसी मुख्यमन्त्रीका रुपमा अघि सारिएको छ ।

क्याटेगोरी : देश/दुनियाँ, प्रमुख समाचार, राजनीति, समाचार
ट्याग : #प्रदेश प्रमुख अमिक शेरचन, #शंकर पोखरेलले पदबाट राजीनामा