फेरि देखियो तारकेश्वरमा बर्डफ्लु, कुखुरा र दाना नष्ट गरियो

खोज पत्रिका शुक्रबार, २०७७ फाल्गुन १४, ११ :३० बजे

काठमाडौं । तारकेश्वर नगरपालिका–१ साङ्लामा फेरि बर्ड फ्लू भेटिएको छ । बर्डफ्लु भेटिएको स्थान र त्यस वरपरका कुखुरा, चल्ला र अण्डा र दाना नष्ट गरिएको छ । संक्रमण पुष्टि भएपछि सो क्षेत्रका हजारौं कुखुरा नष्ट गरिएको छ ।

कमल गौतमले पालेका अण्डा नपार्ने लेयर्स कुखुरा २ हजार ९ सय ५५ वटा, अण्डा पार्ने लेयर्स २ हजार ७ सय २ वटा, अण्डा ३ हजार ५ सय ७० वटा र दाना १ हजार ४ सय ५० किलो नष्ट गरिएको हो । यसैगरी सरिता शाहले पालेका बोइलर कुखुरा २ हजार ९ सय ६० वटा, दाना ७ सय ५० किलो, सम्झना ठकुरी तिवारीले पालेका बोइलर कुखुरा २ हजार ७६ वटा, लोकल कुखुरा १ सय ७ वटा पनि नष्ट गरिएको छ ।

अमृत थापाले पालेका २ हजार २ सय चल्ला र १ सय ५० किलो दाना तथा शान्ता खनालले पालेका लोकल कुखुरा एक सय वटा र टर्की दुई वटा पनि नष्ट गरिएको छ । तारकेश्वर नगरपालिका–१ मै यसअघि बर्डफ्लु पुष्टि भएपछि १ हजार ४ सयभन्दा धेरै हाँस नष्ट गरिएको थियो ।